Хятадын Хэбэй мужид орсон ширүүн бороонд Цагаан хэрмийн 36 метр хэсэг нурсан тухай орон нутгийн хэвлэлүүд мэдээлжээ.Хэвлэлүүдийн мэдээлж байгаагаар, Жанзякоу хотын Дазянмэнь дүүргийн газар нутаг дахь хэсэг даваа гарагт нурсан байна. Ширүүн бороо орох үеэр зэргэлдээх уулын бэлээс орж ирсэн усны хүчтэй урсгал дайрснаас хана эвдэрч нурсан гэж мэргэжилтнүүд үзэж байгаа аж. Одоогийн байдлаар түүхэн дурсгалт байгууламжийг сэргээн засварлах ажил явагдаж байгаа бөгөөд ойрын хугацаанд дуусгана гэж хотын эрх баригчид мэдэгдсэн байна. Түүнээс гадна, мэргэжилтнүүд мөн ширүүн бороонд нурж болзошгүй бусад хэсгүүдийг бэхжүүлж байгаа аж.
Цагаан хэрмийн Дазянмэнь дэх хэсгийг Мин гүрний үед (368 - 1644 он) босгожээ. Хятадын Цагаан хэрэм нь 21 мянга 196 км урт бөгөөд үүний 9000 орчим км-ыг нь Мин гүрний үед босгосон байна. Хамгийн сүүлд мэдээлснээр, өнөөдрийн байдлаар Мин гүрний үед бүтээсэн Цагаан хэрмийн ердөө 8,2 хувь нь анхны хэлбэрээ хадгалан үлдсэн бол 74 гаруй хувь нь эвдэрч сүйджээ. 1987 онд ЮНЕСКО-гийн соёлын өвд бүртгэгдсэн Цагаан хэрэм нь Хятадын гол бэлгэ тэмдэгүүдийн нэг юм.
