Өнгөрсөн долоо хоногт Говь-Алтай аймагтай хил залгаа Хятадын Ганьсу мужийн Ганьнань хошууны Канлхо гацаанд 26 настай Долгор Кьи хэмээх төвд бүсгүй өөрийгөө галдан шатаажээ. Phayul агентлагийн мэдээлснээр Цо хэмээх хийдийн суварганы дэргэд уг эмэгтэй эрх чөлөөгүй болсон Төвдөд Далай ламыг эгүүлэн ирүүлэхийг шаардсан уриа хашгираад тэмцлийн аймшигт хэлбэрийг сонгожээ. Лам нар галыг унтрааж Долгорыг аврахыг оролдоход тэрээр хятад цэргүүд ирж авахаас өмнө толгой руу нь чулуугаар цохин амийг нь таслахыг гуйж байсан байна. Хуврагууд түүний цогцсыг 10 км зайд орших төрөлх Тасур тосгонд нь аваачжээ.

  Оройн 10 цагийн үед Цо хийдийн Чопгэл, Шарав, Чондор хэмээх гурван ламыг цагдаа нар ирж баривчилсан байна. Үүрийн 5 цагт хийдэд цагдаагийнхан хэд хэдэн машинтай ирж, Долгорыг нуун хаацайлсан гэх шалтгаанаар дахин 17 ламыг баривчлан авч явахыг оролджээ. Цогчин дуганы өмнө олон тооны лам нар болон энгийн төвдүүд цугларан өмнө баривчилсан хүмүүсийг суллахаас нааш тарж явахгүй гэж мэдэгдэв.

  Уг өдрийн 13 цаг 30 минутад ойролцоо орших Лаврин Дашгэл хийдээс 300 орчим лам Долгорын гэрийг эргэж хойтын ерөөл уншихаар хөдөлжээ. Хятадын эрх баригчид энэ үйлдлийг нь хууль бус цуглаан хэмээн буруутгаад машиныг нь хураахыг сануулсан байна. Цагдаагийн эсэргүүцэлтэй тулгарсан төвдүүд шууд зам дээр сууцгаан номоо уншицгаажээ.
  Харин уг өдөр өмнө нь энэ төрлийн мэдээллийг тас нуудаг байсан Хятадын албан ёсны мэдээллийн хэрэгслүүд, тухайлбал Синьхуа агентлаг Долгорын өөрийгөө шатаасан талаар мэдээ нийтэлсэн байна.  Уг мэдээнд Долгорыг  цагаан сарын дараа Өвөр Монгол руу мөнгө олохоор явж ажил хийж ирээд нөхөртэйгээ муудалцсаны улмаас өөрийгөө шатаан амиа хорлосон, сэтгэцийн өвчтэй эмэгтэй гэжээ. Хоёр хүүхдээ өнчрүүлэн өөрийгөө хороосон Долгорын тэмцлийн зорилгыг төдийгүй хүүхдүүдийнх нь хүйсийг ч Синьхуа “өөрчилсөн”  байна гэж savetibet сайт мэдээлэв.
  Наймдугаар сарын 10-нд буюу Долгороос гурав хоногийн дараа Сычуань мужийн Амдо нутагт 24 настай Чопа хэмээх лам мөн Бээжингийн бодлогыг эсэргүүцэн зулын гол болжээ. Шуурхай ирсэн цагдаа нар шатаж буй ламыг өшгичин зодож эхэлжээ. Хүнд түлэгдэлтэй ламыг цагдаагийнхан авч явсан бөгөөд одоогоор амьд эсэх нь тодорхойгүй байна гэж Төвдийн төв захиргааны сайт мэдээлсэн байна. Энэ бол өнгөрсөн долоо хоногт Төвдөд зулын гол болж өөрийгөө шатаасан 3 дахь тохиолдол юм. 8 сарын 6-нд Нгаба дахь Кирти хийдийн Лувсан Чүлтэм хэмээх лам галд биеэ өргөн өнгөрсөн ч эрх баригчид шарилыг нь ар гэрийнхэнд нь өгөөгүй байна.
  Лондонд төвтэй Free Tibet байгууллагын үзэж байгаагаар төвдүүдийн аргаа барсан тэмцэл ийнхүү хурцдаж байгаа нь өнгөрсөн 1 дүгээр сард Мэүрүма гацаанд өрнөсөн тэмцлийг хүч хэрэглэн дарсантай холбоотой ажээ.
2009 оны 2 дугаар сард Нгабад анх Даваа хэмээх лам Төвдийн тусгаар тогтнол, Далай ламыг эргэн ирэхийн төлөө өөрийгөө шатааснаас хойш Бээжингийн төдийгүй дэлхийн олон нийтийн анхаарлыг татах гэж нийтдээ 48 төвд хүн тэмцлийн ийм хатуу хэлбэр сонгоод байна.