УИХ дахь МАН-ын бүлэг хуралдаж дууслаа. Ямар асуудлаар хуралдсаныг бүлгийн дарга Н.Энхболдоос тодрууллаа.

-Хурлаар юу хэлэлцэв?

- УИХ-ын төсвийн сүүлийн хагас жилийн төсвийн талаар ярилцсан. Тодруулбал, УИХ гурван бүлэгтэй ажиллана гэсэн төсөв батлагдахаар санал хураагдаад явсан байгаа. Ер нь байнгын хорооны хуваарийг УИХ-д хүргүүлсэн. Мөн УИХ-ын дэд даргад дэвшүүлсэн саналаа хүргүүлж, танилцуулсан. Өнөө өглөө Ерөнхий сайд Засгийн газрын бүтэц бүрэлдэхүүнийг талаар хуулийн төсөлд УИХ-д өргөн мэдүүлсэн. Сая бидний гарт ирсэн. Тиймээс манай бүлгээс ажлын хэсэг байгуулаад маргааш өглөө 10.00 цагаас хуралдана. Уг нь манай бүлгийн хуралд Ерөнхий сайд ирж, танилцуулга хийхээр тохирсон. Гэвч “Шударга ёс” эвслийн бүлэг давхардсан учраас ирж амжсангүй. Тиймээс маргааш өглөө манай бүлгийг хуралдахад ирнэ. Тэгээд бүлгийн хурлаа дуусгаад бид байнгын хороо, чуулганы хуралдаанд оролцоод явна.

- Танай бүлгээс УИХ-ын дэд даргад хэнийг нэр дэвшүүлэв?

- М.Энхболдыг албан ёсоор нэр дэвшүүлээд өргөн барьсан байгаа.

-Байнгын хороог 19 гишүүнтэй байна гээд заачихсан байгаа. Тэгэхээр гурав, гурав гишүүний суудал байна гэсэн үг үү?

-Тийм асуудал байхгүй. Ер нь УИХ-ын гишүүн байнгын хороонд ажиллах эрхтэй. Тэгэх ч ёстой. Манайх гурваас дээшгүй байнгын хороонд орно гэсэн байгаа. Хүн болгон гурван байнгын хороонд орох хувиараа хийгээд өгсөн байгаа. Саяын батлагдсан хуулинаас нь тоо нь зөрвөл эргээд зохицуулахаас өөр аргагүй. Нэгэнт гишүүн болгон 3 байнгын хороонд ажиллана гээд зарласан. Гишүүн болгон 3 байнгын хороонд орно гэсэн нь саяын батлагдсан хуулиас давах магадлалтай. Бусад бүлгийн гишүүд хасагдан манайх гүйцнэ гэвэл болохгүй. Тиймээс байнгын хороон бүтэц бүрэлдэхүүний асуудлыг дахин УИХ-аар ярих шаардлага гарах байх. Бүлгийн зүгээс байнгын хороодод 9-11 гишүүн орохоор хувиараа гаргасан.

- Бүлэг байгуулах асуудал юу болж байна. Хуулиндаа заавал нэмэлт өөрчлөлт оруулна гэхээр МАН-ынханд зориулж өөрчлөлт орууллаа гэх...

- Маш олон ярьж байна. Бүлэг албан ёсоор байгуулагдсан. Энэ хэн нэгэн хүний дур зоргоор байгуулдаг асуудал биш. УИХ-ын сонгуулийн үр дүнд бий болно гээд Үндсэн хуулийн 24 дүгээр заалтад байж байгаа. Үлдсэн нь зөвхөн албажуулах тухай асуудал болохоос аль нэг хүн, байгууллагаас хамаардаг зүйл биш. Монголын ард түмний сонголт. УИХ-ын сонгуулиар бий болсон бүлэг үйл ажиллагаагаа явуулж байна.