30 гаруй холбогдогчтой бүлэг хар тамхичдын хэргийг УМБГ-аас өнгөрсөн долоо хоногт прокурорын байгууллагын хяналтад шилжүүлжээ. 10 гаруй хуудастай хавтаст хэрэгт хяналтын прокурор Ц.Насанбат хяналт тавьж байсан ч Завхан аймгийн прокуророор томилогдсон тул одоо уг хэрэгт Нийслэлийн прокурорын газрын хяналтын прокурор Ц.Уртнасан хяналт тавьж байгаа аж. Хэргийг сануулбал, 2008 оны долдугаар сарын 12-13-нд шилжих шөнө Хан-Уул дүүргийн нутаг дэвсгэр Чингис хаан нисэх буудлын эрэгтэйчүүдийн ОО өрөөнөөс 1 килограмм, 450 грамм мансууруулах бодисыг Эрүүгийн цагдаагийн газрын ажилтнууд илрүүлсэн байна. Наранбаатар, Навчаа, Гоомарал, Эрдэнэбаатар, Онон нар нь Монгол-Бээжин-Малайз, Малайз-Бээжин-Монгол, Монгол-Бээжин-Гуанжу улсын чиглэлд хар тамхийг хил давуулан тээвэрлэдэг байжээ. Тэднээс хоёр нь БНХАУ-ын шүүхээс ял сонссон байна. Мөн уг хэрэгт хоёр хятад иргэн шалгагдаж байгаа юм байна.
Б.Чимэг
