УИХ-ын өнөөдрийн нэгдсэн чуулганаар ЗГХЭГ-ын дарга Г.Занданшатарыг УИХ-ын даргаар томилох эсэх асуудлыг хэлэлцэж байна.

Хурлын үеэр гишүүд асуулт асууж, хариулт авав. Тухайлбал,

УИХ-ын гишүүн С.Бямбацогт “Нэр дэвшиж байгаа журмын нөхөрт баяр хүргэе. Мөн өмнөх УИХ-ын дарга М.Энхболдод нийт гишүүдийн өмнөөс болон хувиасаа талархал илэрхийлье. Намын мөрийн хөтөлбөрийг хэрэгжүүлэх чиглэлд ажиллаж чадсан гэж боддог. Намын шинэ дарга дотоод талцал хуваагдал, эвдрэлийг арилгахад бодитой анхаарч, зөвшилцөлд хүргэхийн төлөө ажиллаасай гэж хүсье. Энэ талаар санаачлагч, манлайлагч байгаасай. УИХ-ын дарга болсны дараа төрийн ажил бүү гацаасай. Энэ талаар юу хийх талаар хариулт өгөөч. Мөн Үндсэн хуульд өөрчлөлт оруулах асуудал яригдаж байна. Төрийн гурван өндөрлөг нь хуваагддаг талцдаг, ард түмэн нь дагаж хуваагддаг байдлыг хэрхэн засах вэ. Мөн Монгол Улс урт хугацааны хөгжлийн бодлоготой болсон. Үүнийг хэрхэн яаж хэрэгжүүлж ажиллах вэ. Талцал хуваагдлыг хэрхэн яаж өөрчлөх вэ. Ард түмэн улстөржилтөөс залхаж байна” гэв.

Ж.Батзандан гишүүн “Монголын парламент хоёр сар гацаж байж шинэ даргын асуудлыг хэлэлцэж байна. Миний хувьд хамгийн түрүүнд Ц.Нямдоржийг дараа нь Т.Аюурсайханыг оруулж ирэх болов уу гэтэл эрх баригч нар дэмжээгүй бололтой. Шинэ цагийн улс төрч гэдэг давуу тал Г.Занданшатарт бий. Нэг сул тал бий Г.Занданшатарт. МАНАН-гийн бүлэглэлийн Ж.Бадамжунай, Б.Хурцтай ойр доо. Миний найз аа, энэ дутагдлаа засаарай гэж захия. Монголын дарга нар томилогдсоныхоо дараа ард түмэнтэйгээ биш авлигач хахуульчидтай нийлдэг буруу тал бий. Монгол Улсын хувьд одоо эгзэгтэй, чухал цаг үед байна. Монголын түүхэнд сайн УИХ-ын дарга байгаасай гэж хүсч байна. Өчигдөр Ерөнхий сайдтай уулзсан. Г.Занданшатарыгаа дэмжээд өгөөрэй гэж гуйж байна лээ. Хийвэл чаддаг залуу байгаа юм гэж байна лээ. Тиймээс би дэмжинэ. Зоригтой ажиллаарай гэж хүсч байна. Томилогдонгуутаа хууль, шүүхийн байгууллагад өөрчлөлт хийж, дарга нарыг нь солиорой. Амжилт хүсье” гэлээ.

УИХ-ын гишүүн Ц.Гарамжав “Монгол Улсын хууль эрхзүйн орчин доголдож байна. Энэ талаар ямар бодит ажил хийх вэ. Та ЗГХЭГ-ын дарга байхдаа төр, хувийн хэвшлийн хамтын ажиллагааг сайжруулах талаар сайн ажилласан. Иргэдийн амьдралыг сайжруулах, эдийн засгийг өргөх талаар та ямар хичээл зүтгэл гаргах вэ. Ажлын байрны тоо нэмэгдэх ёстой. Ажиллах боловсон хүчнээ гадаадад алдаж байна. Үүнтэй холбоотойгоор аж үйлдвэржилтийн бодлогоо хэрхэн дэмжих вэ”

ЗГХЭГ-ын дарга Г.Занданшатар “Зах зээлийн эдийн засгийн үед хувийн хэвшлийнхэнд илүү боломж олгох ёстой гэж бодож явдаг”

УИХ-ын гишүүн Л.Болд “Хуйвалдаан яваад байна. Сая чуулганы өмнө Төрийн байгуулалтын байнгын хорооны дарга Д.Лүндээжанцан чуулганы цагийг бүтэн цаг хумсаллаа. Ингэж болохгүй. Бид энд цаг хүлээж байхад ингэж зориуд гацааж болохгүй ээ. Үүний цаана хуйвалдаан бий. Намрын чуулганыг хааж ээлжит бус чуулганыг явуулааргүй болох гээд байна. Үндсэн хууль зөрчинө шүү Г.Занданшатар дарга аа. Бидний гацсан өдрүүдийг чуулсан гэж үзээд чуулганыг хаах гэж байна. Танай нам, бүлэг дээр хэн болох вэ гээд таавар явсан. Танайд бололцоотой нэр дэвшигч байсан. Юу хийхийг чинь ард түмэн хэлээд өгчихсөн. Өнөөдөр бид баялагтаа эзэн байна гэж хэлсэн. Таныг Салхит, Асгатын ордуудыг төр, ард түмний мэдэлд байх уу гэдэгт зоригтой алхам хийсэн тул ард түмэн дэмжсэн. 1072 хувьцааны ногдол ашгийг олгох талаар шийдвэр гаргасанд дэмжсэн. Энэ хоёр асуудлыг гурав, дөрвөн УИХ дамжаад шийдэлд хүрээгүй. Энэ тал дээр хэрхэн ажиллах вэ?

ЗГХЭГ-ын дарга Г.Занданшатар “Үндсэн хуульд Газрын баялгаа зөв оновчтой ашигладаг, тэр нь ард түмэнд өгөөжтэй байх зарчмыг үргэлжлүүлэн ажиллахын тулд би хичээж ажиллаж байна. Уул уурхайн салбар ил тод байх ёстой. Ийм их баялагтай орны ард иргэд яагаад утаатай, түгжрэлтэй байна вэ. Энэ нь уул уурхайн салбар ил тод биш байсантай холбоотой. Бид хууль ёсны дагуу ажиллаж байгаа төсөл хөтөлбөрийг дэмжих ёстой. Хууль бус үйл ажиллагаа, зөрчлийг УИХ, Засгийн газар нь анхаарч баялагийн тэгш хуваарилалт дээр анхаарах ёстой. Гэтэл энэ бодлого алдагдсан болохоор л эрдэс баялагийн салбарт ийм асуудал үүссэн. Стратегийн ордуудыг төрийн мэдэлд авч, баялгийн хуваарилалтыг тэгш болгох ёстой. Тиймээс цаашид уул уурхайн салбар төдийгүй бизнесийн салбарт хууль ёсны дагуу ажиллагааг дэмжинэ.

Чуулган үргэлжилж байна.

Р.Хишигжаргал