Шидокан каратэгийн дэлхийн аварга шалгаруулах тэмцээн Кувейт Улсад болж, Монголын тамирчид нэг алт, нэг мөнгө, хоёр хүрэл медаль хүртлээ. Уг тэмцээнд оролцож мөнгө, хүрэл медалиар энгэрээ мялаасан Хил хамгаалах ерөнхий газрын “Хилчин” спорт хорооны тамирчин, Хилийн 0303 дугаар тусгай салбарын сэтгэлзүй, мэдээлэл, соёл, сурталчилгааны ахлах офицер, хошууч Б.Ганбаяртай ярилцлаа.

-Каратегийн ДАШТ-ээс хос медальтай ирсэн танд уншигчдынхаа өмнөөс халуун баяр хүргэе.

-Баярлалаа. Тэмцээн Кувейт улсад хоёрдугаар сарын 22-24 болж, Монголоос хоёр дасгалжуулагч, нэг орчуулагч дөрвөн тамирчин оролцоод нэг алт, нэг мөнгө, хоёр хүрэл медаль хүртээд ирлээ. 35 дахь удаагийн тэмцээнд Монголын баг нийлбэр дүнгээр гурвдугаар байрт орсон. Би 85 кг-ын жингийн шидокан карате, шидокан триатлон гэсэн төрөлд өрсөлдлөө. Би шидокан каратегийн төрөлд мөнгө, шидокан триатлоны төрөлд хүрэл медаль хүртсэн.

-Мөнгөн медалийнхаа өнгийг хувиргах боломж хэр байв?

-Алтан медалийн төлөөх тулаанд эзэн орны тамирчинтай эн тэнцүү үзсэн, энэ удаа арай барсангүй. Би каратегийн ДАШТ-д анх удаа оролцож байгаа юм. Миний хувьд Кувейтийн тамирчинаас бэлтгэл сургуулилт, туршлагаар дутуу байсан болохоор ялагдлаа.

-Эзэн орны тамирчинтай тулалдах хэцүү гэдэг дээ?

-Тийм шүү. Эзэн орны тамирчинтай тулалдах нь сэтгэл зүйн хувьд амаргүй даваа. Гэхдээ энэ замыг тойрч гарна гэж юу байх вэ.  

-ДАШТ-д анх удаа оролцоод хоёр медаль хүртэнэ гэдэг чамлахааргүй байна?

-Би энэ спортоор тогтмол хичээллэдэггүй юм. Яг тэмцээнд зориулж бэлтгэл хийсэн нь бага. Ажлын цаг заванд тохируулж бэлтгэлээ хийсэн дээ.  

-Хэдэн орны хэдэн тамирчин өрсөлдөв?

-18 орны 100 гаруй тамирчин оролцсон бөгөөд миний жингийн триатлоны төрөлд 14, карате төрөлд 16 тамирчин өрсөлдлөө. Тэмцээн 65, 75, 85, -95, +95 гэсэн жингийн ангилалд өрсөлдөөн өрнөсөн.

-Шидокан карате гэдэг нь каратегаас юугаараа ялгаатай юм бэ?

-“Дайчдын замнал” гэдэг утгатай каратэгийн нэг төрөл юм. Бусад төрлөөсөө ялгаатай нь барилдаантай. Өчих, боох техникийг давхар хийж болдог. Барилдаантай учраас манай тамирчдад давуу тал үүсгэдэг.

-Тулааны спортын төрлөөр хэд дэх жилдээ хичээллэж байна вэ?

-Каратегаас гадна боксын спортын мастер, гардан тулааны спортын мастер, бие хамгаалах урлагийн спортын мастер цолтой. Миний аав Баттогтох залуу насандаа боксын спортоор хичээллэж явсан. Ардын багш, гавьяат дасгалжуулагч Д.Банди багшийн удирдлага дор бэлтгэл сургуулилт хийж, тэмцээн уралдаанд орж явсан гэдэг. Тамирчин хүний хүү болж төрсөн нь тулаанч болоход нөлөөлсөн байх. 2012 оны үндэсний бие хамгаалах урлагийн УАШТ-ээс алтан медаль хүртсэн нь миний анхны алтан медаль байв. Үүний дараа сонсогчийн алдар тэмцээнд хоёр түрүүлж, бас аваргын бүсний төлөөх тулаанд ялалт авсан.

-Аав тань хэдэн кг-ын жинд тулалддаг байсан бэ?

-1980-аад онд УАШТ-ий 75 кг-ын жинд аварга болж байсан юм билээ. Германы олон улсын тэмцээнд оролцох гэж байхад нь эмээ маань “толгой тархиндаа гэмтэл авчихана” гээд болиулсан гэдэг.

-Боксын рингэнд үзүүлсэн амжилтаасаа дурдвал?

-Насанд хүрэгчдийн УАШТ-ээс  долоон мөнгөн медальтай. -91, +91 гэсэн хоёр жинд тулалддаг байсан.

-Таны жинд алдарт Отгонбаяр ид үзэж байсан даа?

-Тэгэлгүй яах вэ. Одоо ч мундаг байна. Би олон аваргуудтай рингэнд гар зүрүүлж үзсэн, азтай хүн.  

-Шидокан каратегийн спорт саяхан олимпийн наадмын хөтөлбөрт орлоо. Энэ спортоор олимпийн медаль хүртэх боломж манайханд бий юү?

-“Токио-2020” олимпийн наадмын хөтөлбөрт орсон. Манайхаас хоёр эрх авч байгаа сураг дуулдсан. Монголчууд энэ спортын төрлөөр олимпийн медаль авах бүрэн боломжтой. Төр засгаас дэмжээд өгвөл олон арван том амжилт үзүүлэх боломж монгол каратечдад байна. Энэ дашрамд надад дэмжиж тусалдаг ажлын хамт олон, найз нөхөд, гэр бүлийнхэндээ баярласанаа хэлье. Манай хилчид маань намайг тэмцээн уралдаанд оролцож байхад сэтгэл зүрхээрээ дэмжиж, урам зориг их өгсөн. Монгол Улсын өнцөг булан бүрт алба хашиж буй Хийморьлог хилчиддээ болон Д.Алтанхүү багшдаа баярлалаа.

Б.Жаргал