Пара пауэрлифтингийн ДАШТ-ээс алтан медаль хүртэж, дэлхийн дээд амжилтыг шинэчилсэн “Рио-2016” паралимпийн хүрэл медальт, Монгол Улсын гавьяат тамирчин Э.Содномпилжээ болон түүний дасгалжуулагч өнөөдөр мэдээлэл хийлээ. Тус тэмцээн нь хоёр жилд нэг удаа зохиогддог бөгөөд чансаагаараа олимпийн дараа бичигддэг. Казахстанд болсон тус тэмцээнд 77 орны 2700 тамирчин өрсөлдсөн байна. -107 кг жинд 20 орны 22 тамирчин өрсөлдсөн. Гурван хэсэгт хуваагдаж өрсөлдсөн. Захиалгаараа хамгийн хүнд жинг захиалж, өргөсөн. Индонес Улсад болсон Азийн аварга шалгаруулах тэмцээнд 244 кг шахсан. Дэлхийн рекорд 243 кг байсныг нэг кг-аар ингэж ахиулсан. Харин Казахстанд болсон тэмцээний үеэр дэлхийн рекордыг гурван кг-аар ахиуллаа. Ингээд алтан медаль хүртсэн. Өрсөлдөөн маш их байсан. Сэтгэл зүй сайн бэлтгэлтэй байсан учир захиалсан жингээ амжилттай өрсөлдсөн.

80 кг-ийн жинд тамирчин Ган-Эрдэнэ өрсөлдсөн. 43 настай. Нийт 38 орны тамирчинтай өрсөлдөөд 28 дугаар байрт жагссан. Азийн наамамд 117 кг шахсан. Энэ удаагийн тэмцээнд 125 кг шахсан. Энэ тамирчин маань Э.Содномпэлжээгийн шавь” гэлээ. Үүний дараа сэтгүүлчдийн сонирхсон асуултад хариуллаа.

-Монголд бэлтгэл хийж байхдаа хэдэн кг шахаж байсан бэ?

-Дэлхийн аваргад явахаас өмнө 250 кг байнга өргөж байсан. Тэмцээний үеэр 247-г өргөж байсан. Хоёр тэмцээн зохиогдсон зай хэтэрхий ойрхон болсон. Дунд нь 260 кг-аар хоёр удаа шахсан.

-Монголд байхдаа 250 кг өргөж байсан хэрнээ Дэлхийн аварга шалгаруулах тэмцээнд яагаад 247 кг өргөсөн юм бэ?

-Тактикийн асуудал л даа. 2020 онд Токиогийн олимп болно. Үүнд хамаг хүчээ гаргах ёстой. Наана нь бүх зүйлээ гаргачихвал бусад тамирчдад боломж нээж өгөх эрсдэлтэй. Жингийн захиалга өгөх чинь тусгай тактиктай. Хэн хэдэн кг захиалсан нууцхан болдог.

-Хамгийн дээд талдаа хэдэн кг шахдаг юм бэ?

-Тэмцээний бэлтгэлийн үеэр 260 кг шахсан. Цагийн зөрүүнээс хамаарч хүний биед өөрчлөлт орно. Тиймээс яг энэ жингээрээ өргөх эрсдэлтэй.

-Техникийн талаас тайлбарлахгүй юу. Захиалсан жингийн штанкаа хэдэн секүнтэд багтаж өргөх ёстой юм бэ?

-Их нарийн тактиктай. Өргөөд цээжин дээрээ 2 секүнтээс илүү барьвал тооцдоггүй. Өргөлөө, аль нэг тал руу хазайвал тооцохгүй. Биеийн аль нэг хэсэг хөдөлбөл тооцохгүй, гацвал тооцохгүй. Тэгэхээр хэвтснээрээ хэвтээд шууд шахах ёстой. Хүмүүс хараад амархан боддог байх л даа. Өргөөд босоод ирэхэд арьсны сүвээр цус нэвчинэ. Нүдэнд цус харвана. Чихнээс цус гарна. Хамарнаас цус гарах бол энгийн зүйл. Энэ тэмцээнээс эрх авсан тамирчид 2020 оны Токиогийн олимпод оролцоно. Эхний 10 байрт оролцсон тамирчин оролдцоно.

-Энэ төрлийн спортоор хичээллэх залуус олширч байна. Үүнд таны оруулсан хувь нэмэр асар их бий. Паурфилдингийн нэгдсэн холбооноос хэр анхаарч ажилладаг вэ?

-Маш сайн анхаарч ажилладаг. Аймгуудад 19 салбар бий. Нийтдээ 6000 гаруй тамирчин бэлтгэл хийж байна. Улсын аварга шалгаруулах тэмцээнийг жилд гурван удаа зохион байгуулж байна. Би тэмцээний шүүгчээр ажилладаг. Өөрөө тэмцээнд оролцдог. Тоног төхөөрөмжийн хувьд бүх хэрэгслийг авсан. Аль ч улсад тэмцээнд орлоо гэхэд жингийн зөрүү гарахгүй.

Г.Алимаа