Хэзээ ч хуучирдаггүй мөртлөө байсхийгээд улстөржилт, хардлага, эргэлзээ дагуулдаг сэдэв манайд нэг бий. Сэдэв гэхээсээ дуусдаггүй хэрэг. Юу гэхээр одоогоос гурван жилийн өмнө Эрүүгийн цагдаагийн газрын Эдийн засгийн гэмт хэрэгтэй тэмцэх хэлтэс, АТГ-аас Ухаахудаг-Гашуунсухайт чиглэлийн 267 км төмөр замтай холбоотой асуудлаар тухайн үеийн УИХ-ын гишүүн, одоогийн Ерөнхийлөгч Х.Баттулга, ҮАБЗ-ийн нарийн бичгийн дарга, тухайн үеийн Зам тээврийн сайд А.Гансүх нарын хүмүүст албан тушаал, эрх мэдлээ урвуулан ашиглаж, улсад их хэмжээний хохирол учруулсан үндэслэлээр эрүүгийн хэрэг үүсгэн шалгаж байв.

Мөн “Либерти партнерс” компанийн захирал Ч.Ганбат, “МТЗ” ТӨХК-ийн дэд захирал П.Бат-Эрдэнэ нарыг мөнгө угаасан болон хөрөнгө завшсан гэх үндэслэлээр интерполоор эрэн сурвалжилж эхэлсэн байдаг юм.

Сонирхолтой нь, 2017 оны есдүгээр сард Ерөнхийлөгч Х.Баттулга, ҮАБЗ-ийн ажлын албаны дарга А.Гансүх, ТӨХ-ны дарга асан Д.Цогтбаатар нарт холбогдох хэргийг прокуророос хэрэгсэхгүй болгож, Ч.Ганбат, П.Бат-Эрдэнэ нарыг олон улсад эрэн сурвалжлах үйл ажиллагааг зогсоох шийдвэр гаргаж байлаа. Энэ бол хуулийнхны шүүгээнд одоо ч байдаг, хүн бүрийн мэддэг, заримд нь улиг болсон мэдээлэл. Гэхдээ л сонгууль дөхөхөөр задалдаг, дуусахаар нь замхардаг хэрэг болоод удаж байна. Сүүлд Дээд шүүхээс БНСУ-ын иргэн Лий Жон Ёлыг цагдан хоригдсон 515 хоногийг торгох ялд дүйцүүлэн тооцож, торгох ялын хэмжээг 32 сая 275 мянган төгрөгөөр тогтоосон Нийслэлийн Эрүүгийн хэргийн давж заалдах шатны шүүхийн шийдвэрийг хэвээр үлдээсэн нь хэсэгтээ маргаан дагуулсан.

Хамгийн сонирхолтой нь, Ерөнхийлөгч Х.Баттулгыг АНУ-д албан ёсны айлчлал хийж байгаа энэ өдрүүдэд нэгэн хардлага дахин ундарлаа. Тэр нь “Шинэ төмөр зам”-ын хэрэгт нэр холбогдсон, Интерполоор эрэн сурвалжуулж байсан АНУ-ын иргэн Ч.Ганбатыг Ерөнхийлөгч Х.Баттулга эх оронд нь авчрах уу. Яг л хил дамнуулан хүн хулгайлсан хэргээр Германы шоронд хоригдож байсан Тагнуулын ерөнхий газрын дарга асан Б.Хурц шиг. Тэгэхэд Ерөнхийлөгч асан Ц.Элбэгдорж АНУ-д айлчлал хийгээд буцахдаа Б.Хурцын хамт эх орондоо ирж байв. Үүн шиг 2016 оноос хойш сураг алдарсан “Либерти партнерс” компанийн захирал Ч.Ганбат Ерөнхийлөгчийн хамт эх орондоо ирэх магадлал нь өндөр.

“Шинэ төмөр зам” гэх хэрэг сөхөгдөж, Интерполоор эрэн сурвалжлуулж эхлэхдээ тэрбээр ил захидал илгээж байсныг эс тооцвол өнөөдрийг хүртэл хугацаанд Ч.Ганбаттай холбоотой ямар нэгэн мэдээлэл гараагүй л байна.

Ил захидалд “Би болоод миний багт ажиллаж байсан хүмүүс, УИХ-ын гишүүн Х.Баттулга бүгд Монголоо гэсэн чин сэтгэлээр жигүүрлэн, урам зоригтой ажиллаж байсан. Харамсалтай нь амжилттай явсан төслүүдийг улстөржүүлснээр “Шинэ төмөр зам”-ын төсөлд гаргахаар анх баталсан 400 сая ам.доллар 200 сая ам.доллар болж бууран, санхүүжилт зогсож, “Сайншанд” аж үйлдвэрийн төслийн ажилтнуудын цалинг жил гаруй хугацаанд төлөөгүйн улмаас бүх ажил гацаж зогссон.

Улс төржилт 2014 оны эцэс, 2015 оны эхээр улам ширүүсч, намайг АНУ-ын "McKinsey" гэх хуурамч компанийг байгуулан, бусдын хөрөнгийг булаасан, залилсан, мөнгө угаасан гэж гүтгэх нь хэрээс хэтэрч, улмаар ийм зохиомол хэрэгт сэжигтнээр татаж, эрүүгийн хэрэг үүсгээд байна. Хэрэг үүсгэх үед би гадаадад томилолтоор явж таарсан ба энэхүү үндэслэлгүй, зохиомол бөгөөд улс төрийн шинж чанартай хэрэгт хийгээгүй хэргийнхээ төлөө хоригдох хүсэл гэм зэмгүй надад огтхон ч байгаагүй тул Бээжингээс Улаанбаатар нисэх гэж байснаа больсон.

Монгол Улсад үнэн ялж, шудрага ёс тогтох сайн цаг хэзээ нэгэн өдөр ирнэ гэдэгт би хэзээ ч эргэлзэж байгаагүй. Тийм ч учраас би өөрийн хүсэлтээр Монгол Улсад очиж шалгуулж нэрээ цэвэрлэх болно гэдгээ энэхүү захидлаар мэдэгдэж байна.” бичсэн байдаг.

Ямартай ч “Шинэ төмөр зам”-ын хэрэгт эзэн холбогдогчид түрүүчээсээ шүүхээр дэнслүүлж, заримынх нь асуудлыг прокуророос хэрэгсэхгүй болгосон нь үнэн л юм бол иргэн Ч.Ганбат эх орондоо ирж нэр төрөө цэвэрлэх нь зүйн хэрэг болов уу. Эцэст нь асуухад АНУ-д бүгсэн Ч.Ганбатыг авчрах тухай өгүүлбэр айлчлалын төлөвлөгөөнд бий юү?

С.Сүлд