Хичээлийн шинэ жил эхлээд сар орчмын хугацаа өнгөрлөө. Сурагчид номгүй, хэвлэмэл цаасаар тухайн өдрийнхөө хичээлийг аргацааж байна. Өдийд хэвлэлтээс гараад сурагчдын гар дээр оччихсон байх ёстой номнууд хэвлэлтэд ч орж чадалгүй гацчихаад байна.

Уг нь есдүгээр сарын 1 гэхэд сургууль, цэцэрлэгийн бэлтгэл ажил хангагдсан байх ёстой. Гэтэл зарим цэцэрлэг, сургуулийн ажил тендерийн будлианаас болж хойшилж хэд хоногийн өмнө өргөтгөлийнхөө ажлын эхлүүлж байх жишээтэй. Хүүхэд бүр сурах эрхтэй гэсэн мөртлөө 37 мянган орчим хүүхэд сургуулийн өмнөх боловсролд хамрагдаж чадахгүй хуулиас гадуур гэртээ цоожлогдон үлдэж байна.

Энэ оны хичээлийн жилийн хувьд гурван ээлжээр хичээллэдэг асуудлыг халах зорилт тавьсан. Гэвч тендерийн будлиан, байгаль цаг уурын улмаас өргөтгөлүүд хугацаандаа баригдаж чадсангүй гэх тайлбарыг холбогдох мэргэжилтэн өгсөн юм. Эрх мэдэлтнүүдийн хариуцлагагүй үйлдэл дээрх бүтээн байгуулалт ажил хэрэг болж чадаагүй гэхэд болно.

Засгийн газраас ялангуяа салбарын яамнаас 2019 онд боловсролын салбарт түрээсийн сурах бичиг нэвтрүүлж байгаа. Энэ нь сурагч худалдаж авснаас даруй 50 дахин бага бөгөөд түрээсэнд гаргасан уг мөнгөөр дараагийн сурах бичгийг шигэчлэхэд зарцуулна гэж тайлбарлаж байгаа. Ингэхдээ бага ангийн сурагчдад үнэ төлбөргүй олгож, дунд, ахлах ангийн сурагчдад түрээслэх талаар сайд хичээлийн шинэ жилийн өмнө мэдэгдсэн. Ингэхдээ бэлтгэл ажил хангагдсан гэж хэлж байсан ч байдал ийм л байна. Бага ангийн сурагчдын сурах бичгийг 100 хувь тараасан гэсэн ч зарим сурагчид номгүй байна лээ. 

Бүтээн байгуулалт нь дарга нарын будлианаас болж хойшилдог юм байж. Ядаж ном, сурах бичгээ хугацаанд нь бэлэн болгодог баймаар байна. Боловсролын салбарт амь оруулах гэж хөтөлбөр шинэчлэх зэрэг ажилд тань олон нийт сайшаалтай хандаж байсан ч жил дараалан сурах бичгийн хэвлэлт гацаж байгаагаас таны өмнөх хийсэн ажлууд үр дүнгүй дүгнэгдэх нь байна шүү.     

Уг нь энэ хичээлийн жилд сурах бичиг төлбөртэй ашиглуулах хүрээнд дунд, ахлах ангийн 181 мянга гаруй хүүхдэд 2.6 сая ширхэг сурах бичиг хэвлүүлэх тооцоо гарсан. Гэвч нэг нь ч хэвлэлтэд орж чадалгүй гацаж байгаа шалтгаан нь Азийн хөгжлийн банкны санхүүжилт ороогүйтэй холбоотой юм билээ. Манай улс гаднын банкны зээл хүлээтлээ мөнгөгүй гэж үү. Ядаж хүүхдүүдийнхээ боловсролоос гар татмааргүй байна.

Өнгөрсөн жилийн төгсөх ангийн сурагдын монгол хэл, бичиг, уран зохиолын ном гуравдугаар улиралд сурагчдад очсон. Бараг хичээлийн жил дуусч байхад шүү дээ.  Сурагчид хэзээ номтой золгох вэ, сайд аа. Энэ жил ч байдал давтагдах магадлал өндөр байна.

Б.Лхам