Ерөнхий сайд Н.Алтанхуяг Засгийн газрын тэргүүний ажлаа аваад “авлига авдаг  хүнийг хоймортоо байтугай хатавчиндаа суулгахгүй” гэж авлигатай тэмцэхээ мэдэгдэж байсан. Тэрбээр яам нь салбарын тендерээ мэддэг байсныг болиулж шинээр тендерийн агентлаг байгуулахаар болсон билээ. 15 агентлагийг татан буулгаж байгаа хэрнээ Худалдан авах ажиллагааны газрыг шинээр байгуулж байгаа нь цаанаа нарийн учиртай аж. Үнэхээр тэр авлигатай тэмцэхийн тулд эхлээд “тендерчид”-тэй тэмцэх хэрэгтэй гэдгийг ухаарсан бололтой. Засгийн газар байгуулагдахаас өмнө АН-ынхан “Засгаа хурдан байгуулахгүй бол МАН-ын сайд нар хууль бус тендер, төслөөр мөнгө идээд байна шүү” гэх утгатай мессеж тарааж байсан. Энэ талаар баттай нотолгоо байгаа мэтээр ярьцгааж байсан юм. Тэгвэл яг энэ цэг дээр ерөнхий сайд авлигтай тэмцэх ажлаа эхэлжээ. Тэрбээр сүүлийн үед төсөв мөнгө нь батлагдаад хэрэгжээд эхэлчихсэн байгаа тендерүүдийг зогсоож, мөнгийг нь буцааж эхэлсэн байна. Ойролцоогоор нэг дүүргийн тендерээс нэг тэрбум төгрөг буцаан татахаар төлөвлөн ажилдаа орсон тухай эх сурвалжууд мэдээллээ.

   Хэдийгээр зарлагдсан тендер 60 хувийн биелэлттэй байгаа, тендерийн гүйцэтгэлийг шахаж байгаа гэсэн мэдээлэл цацаж байгаа ч үүний цаана цөөнгүй бизнесмэнүүдийн ажил гацаж эхлээд байгаа юм. Орон нутагт ч мөн С.Батболдын Засгийн газраас санхүүжсэн тендерүүдийг буцааж эхэлжээ.
   Хамгийн сонирхолтой нь Н.Алтанхуяг ил зарлахгүй байгаа ч өнгөрсөн дөрвөн жилд МАН-ын Засгийн газрын баталсан бүх тендерүүдийг шалгахаар болсон аж. Ажлаасаа чөлөөлөгдөж, өөр албан тушаалд очиж байгаа хуучин сайд, дарга нарыг хүртэл тендертэй холбоотойгоор шалгах юм байна. Өнгөрсөн дөрвөн жилд хуруу, гараар тоолоод барашгүй олон тендер зарлагдсан, хэрэгжсэн учир энэ ажилд нэлээд цаг хугацаа орох бололтой. Хуучин яамны ажилчид ч Н.Алтанхуягийн шалгалтын сургаар сандарч эхэлсэн гэнэ.

   Харин ингэж тендерээс буцааж татсан мөнгөө ерөнхий сайд Н.Алтанхуяг Ардчилсан намаас амлаад байгаа, аравдугаар сарын нэгнээс хэрэгжинэ гэж буй хүүхдийн мөнгөнд зориулна гэж эх сурвалж мэдээллээ. Өөрөөр хэлбэл ашиг багатай, авлигалд очиж болзошгүй байсан мөнгийг хүүхдүүдэд зориулахаар болжээ. Энэ нь нэг талаас ерөнхий сайдын нэр хүндийг өсгөнө, нөгөө талаас дөрвөн жил таахалзсан МАН-ынхны хар хөлсийг цувуулж байгаа бололтой. Олон “тендерчин” овогтой гишүүдтэй байсан МАН-ынхныг ийнхүү нэг нэгээр шалгахаар зэхэж, “том загас” барих үүрэг авсан АТГ-ын ажил ундарч эхлэх нь.