Уул нь “Нэг л хүн дутуу” гэдэг дуу микроны кондукторуудын дуу байлаа. Гэтэл одоо тэдэнд зориулаад “Нэг л хүн илүү” гэдэг дуу зохиохоор болжээ.

Уул нь “Нэг л хүн дутуу” гэдэг дуу микроны кондукторуудын дуу байлаа. Гэтэл одоо тэдэнд зориулаад “Нэг л хүн илүү” гэдэг дуу зохиохоор болжээ.
Та гурван өдөр гэрээсээ ажилруугаа, ажлаас гэрлүүгээ микроор явахад л энэ унаагаар үйлчлүүлэгчдийн тоо ямар их байгааг мэдрэх болно.

Микроны эздүүд их уриалгахан. Оръё гэсэн хүн бүгдийг суулгаад авчихна. Өглөө, оройдоо ажил, гэрлүүгээ яарч яваа хүмүүст ямар тустай гээч. Харин яарч яваа нөхдийг суулгахгүй гээд хэл ам хийгээд эхэлбэл “Нэг л хүн илүү” гээд л амийг нь таглачихна. Дүүрэн үйлчүүлэгч байгаа хойно аргагүй биз.

Хавийн яарч яваа хүнийг чихэж авсан бичил бус маань үйлчлүүлэгчдээ цагаас нь өмнө ажилд нь хүргэж өгөхийн тулд ур чадварын ажлаа эхлэнэ. Нэгэн цагаан модтой нөхөр зогсоочихвол хамаг хүний ажлыг баллах болохоор зөвхөн тэд л явдаг өнцөг булангаараа яваад цагаан модтоныг сүлжээд гарчихна. Буух ёстой буудлаасаа арай жаахан холдсон нэгэнд нь “Олныхоо төлөө шүү, Нэг л хүн илүү” гэж хэлнэ.

Оройн цагаар микроны үйлчилгээ нэг буудал явсан ч 1000 төгрөгийн ханштай болоод удлаа. Ижил зайд өдрийнхөөсөө хоёр дахин их үнээр авдаг нь учиртай. Магадгүй тэд илүү үйлчилгээний хөлсөөрөө микроо тохижуулах гэж байгаа байх. Лав л энэ цагаар автобус ховор тул хэл ам татлах үйлчлүүлэгчдэд “Нэг биш Нэлээд олон хүн илүү” гэдгийг сануулчихна.

Овоо цэгцрээд явж байтал сүүлийн үед мода болсон шилдэг үйлчилгээгээ үзүүлнэ. “Арын микрод ороод суу” гэнэ. Ар, өврийн нийлсэн хэдэн хүмүүс өвөр дээрээ суугаад л явна. Энэ үед өдөржингөө ажил дээрээ ядарсан нөхөр уураа барьж дийлэлгүй хэрүүл хийнэ. Азгүй тэр нөхөр л илүү хүн болж мөнгөтэйгөө хамт хөөгдөнө.

Энэ жишгээрээ ийм сайхан үйлчилгээ ямар үнэд хүрэх бол. Холбогдох байгууллагууд нь “тус” бүтээж буй микрынхоныг “харж халамжилмаар” юм.