УИХ-ын гишүүн асан ИЗНН-ын гурван даргын нэг Д.Энхбатыг УИХ-ын сонгуулийн өмнө намаас нь хөөх тухай мэдээлэл гарч байсан. Гэсэн ч тэрбээр өөрийн хүсэлтээр сонгуульд өрсөлдөхгүй тухайгаа мэдэгдэж энэ шуугиан намдсан. Тэгвэл ойрын өдрүүдэд Д.Энхбатыг намаас нь хөөх тухай дахин бодитойгоор яригдаж эхэлжээ.  Учир нь тэрбээр намын дарга гэсэн нэр зүүсэн хэрнээ намын ажилдаа огт оролцохгүй байгаа аж.  Өчигдөр гэхэд “Иргэний Зориг” нэртэй шинэ жигүүр байгуулагдаж түүнийг намын дотоод эв нэгдэлд харш үйл ажиллагаа явуулсан гэж намаас хөөх өргөдлийг Хяналтын зөвлөлд гаргасан байна. Тэгээд ч сүүлийн үед ИЗНН дотроо хагаралтай байгаа нь үүнд нөлөөлсөн гэж зарим эх сурвалж хэллээ.  “Иргэний Зориг" жигүүрийнхэн намын дарга С.Оюуныг бусадтайгаа зөвлөлгүй хуулийн төсөл санаачилсан хэмээн мөн буруутгасан юм.