Чингэлтэй дүүргийн шүүхээс 3.6 жилийн хорих ял сонсон, хоригдож буй
ОБЕГ-ын дарга асан П.Даш, тус газрын Улсын нөөц бүрдүүлэлтийн газрын
дарга асан Л.Алтангэрэл нарын гомдлыг маргааш Нийслэлийн шүүхэд
хэлэлцэнэ. Харин П.Дашийн ар гэрийнхэн түүнийг батлан даалтад гаргах хүсэлт гаргасан тул П.Даш батлан даалтаар суллагдсан байгаа юм байна.
Чингэлтэй дүүргийн шүүхээс П.Даш, Л.Алтангэрэл нарыг Эрүүгийн хуулийн 150 дугаар зүйлийн 150.3, 263 дугаар зүйлийн 263.2 дахь хэсэгт заасан гэмт хэрэг үйлдсэн гэм буруутайд тооцож, тус бүр 5.000.000 төгрөгийн эд хөрөнгө хурааж, 3 жил 6 сарын хугацаагаар хорих ял оногдуулсан.
Мөн П.Дашаас 460.036.000 төгрөгийг, Л.Алтангэрэлээс 149.500.000 төгрөгийг тус тус гаргуулж, Онцгой байдлын ерөнхий газарт олгохоор шийдвэрлэсэн билээ.
Тэдэнд холбогдох шүүх хурал өнгөрсөн оны есдүгээр сарын 29-нд болж, тэднийг төрийн өмчийг хувьдаа завшсан хэмээн Хан-Уул дүүргийн шүүхээс 3.6 жилийн ял оноосон ч “Өршөөлийн үзүүлэх тухай хууль”-д хамруулан сулласан юм.
Гэвч П.Даш анхан шатны шүүхийн шийдвэрийг “Хуульд нийцээгүй, би улсын хөрөнгө мөнгө хувьдаа завшаагүй. Хэрэг хийгээгүй байхад ял оноосон. Өршөөлийн хуульд хамруулсан хэргээ заавал цагаатгуулна. Нэр төрөө сэргээлгэнэ” гэж үзэн, Нийслэлийн давж заалдах шатны шүүхэд гомдол гаргаад байсан.
Түүний гомдлыг Нийслэлийн шүүхэд хэлэлцэн, анхан шатны шүүхийн шийдвэрийг хүчингүй болгосон юм. Ингэснээр түүний хэргийг нэмэлт мөрдөн байцаалт явуулалгүйгээр анхан шатны шүүхээр дахин хэлэлцүүлэхээр болсон. Гэхдээ хэргийг өмнө нь шийдсэн Хан-Уул дүүргийн шүүхэд бус Чингэлтэй дүүргийн шүүхэд шийдвэрлүүлэхээр харьяаллыг нь өөрчилсөн билээ.
Харин Чингэлтэй дүүргийн шүүхээс тэдний гэм буруутайг нь батлаад 6.6 жилийн хорих ялаар шийтгэж, гурван жилийг Өршөөл үзүүлэх хуульд хамруулан 3.6 жилийн хорих ялыг биечлэн эдлүүлэхээр болсон юм.
Тэдэнд К.Бауржин, Б.Ганбаатар нар өмгөөлөл үзүүлж байгаа билээ.
Б.Чимэг
