УИХ-ын хоёр гишүүний дуулиант зодооны домог намжаагүй байна.  Тэдний зодооныг жирийн иргэдээс эхлээд УИХ-ын гишүүд хүртэл янз бүрээр тайлбарлах болсон. Гэвч хоёр гишүүний зодоон бусдын таамаглаж байсан шиг өргөн хүрээг хамарч шүүх, цагдаадаа тулахгүй гэж эх сурвалж тайлбарлав.
    Учир нь У.Хүрэлсүх, Г.Баярсайхан хоёрын асуудлыг хуулийн байгууллагаар биш УИХ-ын ёс зүйн дэд хороогоор шийдүүлэх ёстой гэж үзэж байгаа хүмүүсийн тоо нэмэгдэх болжээ. Тэгээд ч УИХ-ын цөөнгүй гишүүд энэ хоёр эрхэмийг эвлэрүүлэх гэж хичээж байгаа гэнэ. Гэвч “гай газар дороос” гэгчээр тэдний хооронд “хар муур гүйлгэх” гэсэн ажиллагаа тасрахгүй байгаа аж. Аль аль нь эмзэг болохоор элдэв яриа сонсоод бие биедээ гоморхож уучилж, өршөөх өгөөмөр сэтгэлээ гээдэг бололтой.
   Сүүлийн үед У.Хүрэлсүх өөрийгөө эр хүн гэдгээ батлах гэсэн удаа дараагийн оролдлого хийлээ. Тэр үнэхээр эр хүн мөн үү гэх мэт этгээд хатгаасууд ч нэмэгдэж эхэлжээ. Бас Г.Баярсайханыг эм хүн шиг зантай гэсэн имиж ч баталгаажиж байгаа бололтой. Хамгийн сүүлд хотын дарга Э.Бат-Үүлийг заамдаж авсан мэтээр дэл сул мэдээлэл ч тасрахгүй байна.
   Засгийн газрын ордныхоны мэдээлж байгаагаар эрхэм гишүүд шаргал ордондоо эгц тааралдахгүйг хичээдэг гэнэ. У.Хүрэлсүхийг ордны коридороор явж байгааг Г.Баярсайхан харчихаад буцаад алхчихдаг. Эсвэл зүгээ буруулан арилж өгдөг сурагтай. Өөрөөр хэлбэл Г.Баярсайхан гишүүн У.Хүрэлсүхтэй ордны хонгилд хоёулахнаа халз тааралдахаас эмээдэг бололтой. Барьж аваад гөвчихвөл гэрчгүй юм болно гэж боддог юм уу эсвэл угаасаа түүнтэй нүүр тулж уулзах шаардлагагүй гэж хичээдэгийнх нь илрэл ч байж мэднэ.
    Харин У.Хүрэлсүх гишүүн Г.Баярсайханы өрөөний үүдээр алхах дуртай болсон гэж эх сурвалж өгүүлэв. Байсхийгээд л Г.Баярсайханы өрөөний үүд хавиар алхаж явдаг аж. Тэрээр Г.Баярсайхныг айлгах гэж эсвэл тааралдвал эр хүний ёсоор нүүр тулчих гэж боддог байж мэднэ. Магадгүй хэн нэгэн зуучлагчгүйгээр сайхан учраа олчих гэж хичээгээд ч байж болох юм.
    Гэвч эрхэм гишүүд чуулганы танхимд тааралдахаараа мэндийн зөрүүгүй өнгөрдөг гэж ажиглагч өгүүлэв. Зүгээр л өмнөхөө хийж, хажуудах гишүүдтэйгээ инээлдээд өнгөрдөг аж. Ийнхүү камерийн өмнө сүр дуулиантай "мандсан" парламентын зодоонч гишүүд учраа олох гэж  их л сүрхий юм болж байгаа сурагтай.