"МАХН-МҮАН"-ын "Шударга ёс" эвслийн нэг суудал УИХ-д хоосон байгаа. Тус эвслийн жагсаалтаар УИХ-ын сонгуульд нэр дэвшсэн Ц.Оюунбаатар тангараг өргөх байсан ч хойшлогдсоор өдийг хүрсэн. Тэгвэл Ц.Оюунбаатар өчигдөр УИХ-ын гишүүний түр үнэмлэхээ авчээ. Тиймээс ойрын өдрүүдэд УИХ-ын гишүүний тангарагаа өргөх юм. Тэрбээр сонгуулийн дүн гарснаас хоёр сарын дараа ийнхүү түр үнэмлэхээ авч байгаагаа "Н.Энхбаяр дарга гуйсан учраас" гэж тайлбарлажээ. МАХН-ын дарга Н.Энхбаяр учир байдлаа хэлж түр хүлээхийг хүссэн байна. Ц.Оюунбаатар "Н.Энхбаяр гэдэг хүн тайлбар, үндэслэлээ хэлж гуйсан, би жудаг гаргасан учраас л тангараг өргөөгүй. Түүнийг цагаадаад УИХ-ын гишүүн болох болов уу гэсэн нийгмийн хүлээлт байсан. Гэхдээ шүүхийн шийдвэр өөрөөр эргэлээ" гэжээ. Ц.Оюунбаатар ийнхүү тангараг өргөх болсноор Н.Энхбаярын хүү Э.Батшугар УИХ-ын гишүүн болно гэх яриа биелэх боломжгүй болж байна.