Нийслэлийн нийтийн тээврийн унаагаар зорчиход янз бүрийн асуудал  тохиолддог. Мэдээж, захирдаг газар нь матмаар ч юм гарна. Зарим кондукторууд "чаддаг юм бол буугаад таксидахгүй юу” гэж доош нь хийх энүүхэнд байдаг.
   Тэгвэл та кондуктортой маргах юм уу, “Аятайхан яваачээ. Ямар хөлдүү мах ачиж яваа юу” гэж жолооч руу хашгирах хэрэггүй. Маргаашнаас эхлээд танд иймэрхүү таагүй зүйл тохиолдвол дор нь утсаа гаргаж ирээд холбогдох газар руу ховлох боломжтой болж байна.
   Нийслэлийн нийтийн тээврийн газар,  тухайн автобусны компанийн иргэдээс санал гомдол авах, үйлчилгээний хүний наад захын соёлгүй нөхдөд банга хүртээн хүмүүжүүлэх үүрэг бүхий албаны хуудсыг автобусны гадна, дотор талд маргааш өглөө гэхэд наасан байх болно. Санал гомдол хүлээн авах энэ хуудсыг өнгөрсөн шөнө хэвлэж дуусжээ. Нийслэлийн нийтийн тээвэрт өдөрт  мянга гаруй тээврийн хэрэгсэл  үйлчилж байгаа нь нэг үеэ бодвол хүртээмжтэй болсон ч тэдний үйлчилгээний соёл, хөдөлгөөний  аюулгүй байдал үйлчлүүлэгчдийн сэтгэлд хүрэх болоогүй байгааг өөрчлөх ажил эндээс эхэлж байгаа гэнэ.