Захиргааны хэргийн давж заалдах шатны шүүхт өнөөдөр Увс аймгийн сонгуулийн маргаантай холбоотой хэргийг Захиргааны хэргийн шүүхийн харъяаллын хэрэг эсэхийг шийдэх хурал болох талаар бид өмнө нь мэдээлсэн.

УИХ-ын сонгуулийн 15 дугаар тойрог буюу Увс аймагт МАН-аас нэр дэвшсэн Б.Чойжилсүрэн, Ч.Хүрэлбаатар нар мөнгө тараасан явдлыг баримтжуулсан нэр бүхий 13  иргэн тойргийн хороонд гомдол гаргасан юм. Харин тойргийн хорооны МАН-аас томилогдсон гишүүд олонх байгаагаарай далимдуулж уг гомдлыг хэлэлцээд хууль зөрчөөгүй гэсэн шийдвэрийг гаргажээ. Тиймээс иргэдийн саналыг худалдаж авах зорилгоор тараасан явдлыг хууль зөрчөөгүй гэж үзсэн тойргийн хорооны шийдвэрийг Тариалан сумын нэр бүхий 13 иргэн Увс аймгийн Захиргааны хэргийн шүүхэд өгчээ. Харин Увс аймгийн Захиргааны хэргийн шүүх энэ гомдлыг өөрийн харъяаллын хэрэг биш гэж үзсэн юм. Тиймээс гомдол гаргасан иргэд Захиргааны хэргийн давж заалдах шатны шүүхэд гомдол гаргажээ. Иргэдийн гаргасан гомдлыг авч хэлэлцсэн Ц.Цог тэргүүтэй шүүх бүрэлдэхүүн хуралдаж “уг хэрэг нь Захиргааны хэргийн шүүхийн харъяаллын хэрэг мөн гэсэн тогтоолыг гаргалаа. Тиймээс уг хэргийг Увс аймгийн Захиргааны хэргийн шүүх хэлэлцэхээр болж байна. Саналыг нь худалдаж авахыг завдсан этгээдүүдийн эсрэг тэмцсэн малчид ийнхүү эхний ялалтаа байгуулжээ. Хэрэв Увс аймгийн захиргааны хэргийн шүүх тойргийн хорооны шийдвэрийг хууль зөрчсөн гэж үзвэл УИХ-ын гишүүнээр сонгогдоод буй Б.Чойжилсүрэн, Ч.Хүрэлбаатар нарыг эргүүлэх татах юм.