Нийслэлийн иргэдийн төлөөлөгчдийн хурлын ээлжит бус хуралдаан өнөөдөр болж  “Газрын харилцаа хот төлөвлөлт, барилгажилтад гарч буй зөрчлийг таслан зогсоох цаашид авах арга хэмжээний тухай тогтоол”-ыг батлах асуудлыг хэлэлцэх байсан ч НИТХ дахь  МАН-ын бүлэг завсарлага авснаар тус тогтоолын төслийг  14 хоногийн дараа хэлэлцэхээр болсон юм.
Завсарлага авсан шалтгаанаа НИТХ дахь МАН-ын бүлгийн дарга Д.Амарбаясгалан тайлбарлахдаа “асаг дарга үйл  ажиллагааныхаа  хөтөлбөрийг батлуулах хуультай байдаг. Тодорхой төлөвлөгөөтэй, төсөвтэй ажлаа явуулъя гэсэн шаардлага тавьсан. Өнөөдрийн байдлаар Э.Бат-Үүл дарга 2011 онд баталсан МАН-ын  мөрийн хөтөлбөр, төсвөөр үйл ажиллагаа явуулж байгаа.  Тэгэхээр өөрийн мөрийн хөтөлбөр, баталсан төсвөө тодотгож  үйл ажиллагаа явуулах ёстой. Үүнтэй холбоотой Э.Бат-Үүл дарга биднийг газрын асуудлаар завсарлага авч байна гэж үзлээ.  Бид газрын асуудлыг огтхон ч хойш тавиагүй” гэв.
Харин Э.Бат-Үүл “НИТХ дахь МАН-ын бүлэг завсарлага авах эрхтэй. Хамгийн санаа зовж байгаа зүйл нь НИТХ өнөөдөр зөвшөөрөлгүй барьсан  барилгыг зогсоох, бага дээр нь буулгах, шинээр зөвшөөрөл олгохгүй байх асуудлыг хэлэлцэх байсан. Харамсалтай нь маш чухал  асуудлыг МАН-ын бүлэг гацаалаа. Энэ хооронд барилгын компаниуд өдөр, шөнөгүй сохор номин шиг ажиллаж байна” гэсэн юм.