Өнгөрсөн дөрвөн жилд үнийн өсөлт, вальютийн ханш гээд чихэнд нь байнга хонх уяастай байсан Монголбанкны ерөнхийлөгч Л.Пүрэвдорж ажлаасаа халагдах өргөдөл гаргасны дагуу энэ газар шинэ ерөнхийлөгчтэй боллоо. Гэхдээ хаяанаасаа буюу дэд ерөнхийлөгчийн суудлаас Н.Золжаргалыг өгсүүллээ. Монгол банк гэдэг улс төрөөс ангид байх ёстой гэдэг ч шинэ Засгийн газар, шинэ УИХ солигдох бүрт удирдлага нь өөрчлөгддөг нь нэгийг харуулна. Угтаа энэ газрын ерөнхийлөгчийг зургаан жилд нэг удаа томилох заалт байдаг ч ийнхүү УИХ шиг дөрвөн жилд нэг удаа өөрчлөгддөг бичигдээгүй хууль үйлчилсээр байгаа юм. Энэ удаа ч Л.Пүрэвдорж жилээ гүйцээлгүй ажлаа өглөө. Харин Монгол банкны шинэ ерөнхийлөгчид нөгөө л үнийн хөөрөгдөл, вальютийн ханш, зээлийн хүүг бууруулах гэх зэрэг асуудлууд үлдэж байна.

   Н.Золжаргал нь БНУУ-ын Будапешт хотын Эдийн засгийн их сургуульд Эдийн засгийн ухааны магистр хамгаалсан. Мөн Харвардын их сургуульд мастерийн зэрэг хамгаалсан цөөхөн монгол хүний нэг юм. Тэрбээр 1990 оны үед Худалдаа хөгжлийн банкны Гадаад харилцааны хэлтэст захирлаар ажиллаж байгаад Монголын хөрөнгийн биржийн гүйцэтгэх захирал болжээ. Сонирхолтой нь Н.Золжаргал 1996-1997 оны хооронд АНУ-ын Харвардын их сургуульд зөвлөх, 1997-1998 онд МУ-ын Ерөнхий сайдын зөвлөх хийж байжээ.  Харин 2000 оноос хойш хувиараа бизнес эрхэлж байгаад 2010 онд Монгол банкны дэд ерөнхийлөгч болоод хоёр жилийн дараа ийнхүү ерөнхийлөгч нь болжээ.

   Түүнийг энэ албанд томилоход УИХ-ын гишүүдийн хамгийн их асууж байсан нь үнийн өсөлтийг хэрхэн барих, вальютийн ханшийг яаж тогтворжуулах зэрэг асуулт байв. Харин тэрбээр “Банкны системийн байдал өмнөх хямралтай харьцуулахад арай дээр байгаа. Гэхдээ дэлхийн эдийн засгийн хямралын явц байдлыг харахад бид тайван сууж болохооргүй байгаа гэв. Мөн шинэ Засгийн газрын мөрийн хөтөлбөрт орсноор банкны хүүг болоод инцляцийг нэг оронтой тоонд барихын тулд тууштай тэмцэнэ. Зээлийн хүүг ч бууруулах бүрэн боломжтой ” гэсэн юм. Удахгүй хүүхпийн мөнгө тарааж эхлэхээр юмы үнэ өсөх магадлалтай гэсэн хүлээлт аль хэдийн үүссэн байна. Харин шинэ ерөнхийлөгч инфляцийг нэг оронтой тоонд барина гэж амаллаа. Мөн Н.Золжаргал Монгол банкны ерөнхийлөгч болоод хамгийн түрүүнд хийх зүйл нь долларын ханшийг буулгах гэж УИХ-ын гишүүдийн өмнө амласан юм. Өдгөө 1400 хүрчихээд байгаа долларын ханш манай эдийн засагт хүчтэй нөлөөлдөг. Тиймээс Н.Золжаргалын амлалт хэзээ, хэрхэн биелэх вэ гэдгээр Монголбанкны шинэ ерөнхийлөгчийг шинжих нь. 

                                                                                                                                                                                                                         Т.Гэрэл