УИХ-ын Нийгмийн бодлогын байнгын хорооны өнөөдрийн хуралдаанаар нэгэн  ноцтой асуудлыг хөндсөн нь “Чингис хаан”, Үндэсний хөрөнгө оруулалтын банктай холбоотой байлаа. Тодруулбал, тус хоёр банкинд байршуулсан Эрүүл мэндийн даатгалын сан, Нийгмийн даатгалын сангийн мөнгө эрсдэлд орсон байна. Энэ талаар УИХ-ын гишүүн, Нийгмийн бодлогын байнгын хорооны дарга М.Оюунчимэг асуулт асууж, холбогдох албаныхнаас хариулт авлаа.

Нийгмийн бодлогын байнгын хорооны дарга М.Оюунчимэг: "Төлбөрийн чадвар буурсан нэр бүхий хоёр банкинд байршуулсан Эрүүл мэндийн даатгалын сан, Нийгмийн даатгалын сангийн 161.5 тэрбум төгрөгийн гэрээний үүргийн биелэлт хангалтгүй болж, хүүгийн орлого олох боломж хомсдож, байршуулсан мөнгөнд эрсдэл үүсч байна" гэж Үндэсний аудитын газар дүгнэсэн байна. Эрсдэл бүхий хоёр банк гэдэг нь яг ямар вэ. Үүнийг Үндэсний аудитын газраас тухайн бүрд нь холбогдох газруудад нь хэлж байсан уу. Эрсдэлд ороод байгаа хоёр банкнаас татвар төлөгчдийн мөнгөө авч чадах юм уу, чадахгүй юм уу? 

ҮАГ-ын Санхүүгийн аудитын газрын захирал, тэргүүлэх аудитор Ц.Наранчимэг: Эрсдэлтэй хоёр нь Чингис хаан банк, Үндэсний хөрөнгө оруулалтын банк юм. Эрүүл мэндийн даатгалын ерөнхий газар энэ хоёр банкны эсрэг шүүхэд нэхэмжлэх гаргасан байгаа.

Сангийн яамны төрийн нарийн бичгийн дарга С.Наранцогт: -Эрсдэлтэй гэсэн хоёр банкнаас мөнгөө татаж авахыг аудитаас зөвлөсөн, Сангийн яамнаас ч холбогдох газруудад нь анхааруулж, албан бичиг илгээсэн. Эрүүл мэндийн даатгалын сан, Нийгмийн даатгалын сангийн үндэсний зөвлөл нь хүүгийн орлого олно гэж үзээд мөнгөө арилжааны банкуудад байршуулчихдаг. Уг нь төрийн өмчит аж ахуйн нэгжүүд, сангууд мөнгөн хөрөнгөө банкинд байршуулахдаа үндэсний хэмжээний системийн банкуудад байршуулах зөвлөмж байдаг. Гэтэл энэ зөвлөмжийг хэрэгжүүлж ажиллахгүй байна. Үүнээс болоод одоогийн нөхцөл байдал үүссэн. Энэ хоёр банкинд байршуулсан мөнгийг авч чадахгүй олон жил болж байгаа. Тиймээс шүүхээр шийдүүлье гээд явж байна гэв.

У.Тэргэл