Коронавирусний халдварын улмаас эмчлүүлэх гээд эмнэлэг хооронд явсаар эцэстээ “Энэрэл” эмнэлгийн үүдэнд амьсгал хураасан харамсалтай явдал болсон. Эл хэрэгт дээд, дунд, доод шатны албан тушаалтнуудад хариуцлагын асуудлыг ярьж эхэлсэн бөгөөд эн тэргүүнд НЭМГ-ын эмнэлгийн тусламжийн хэлтсийн дарга М.Мөнхдэлгэр, “Энэрэл” эмнэлгийн дарга А.Амартүвшин, Яаралтай тусламжийн 103 төвийн дарга Ц.Пүрэвдаш нарыг ажлаас нь чөлөөлөх арга хэмжээ авсан тухай мэдээлсэн.

Уг мэдээллийг өнгөрсөн амралтын өдрүүдэд хэвлэлээр цацаж, иргэд ч хариуцлага тооцжээ гэж ойлгосон. Гэтэл Яаралтай тусламжийн 103 төвийн дарга Ц.Пүрэвдаш огцрох нь бүү хэл өөрөө сугарч үлдэн, эсрэгээрээ орлогч даргаа огцруулах тушаал гаргажээ. Тодруулбал, 2021 оны долоодугаар сарын 5-ны өдөр 5/137 тоот С.Ариунболдыг ажлаас чөлөөлөх ТУШААЛ

Хөдөлмөрийн тухай хуулийн 40 дүгээр зүйлийн 40.1.4 дэх хэсэг, байгууллагын хөдөлмөрийн дотоод журмын 6.6.2, 6.6.2.12 дэх хэсэг, Эрүүл мэндийн сайдын 2019 оны 227 дугаар тушаалыг үндэслэн тушаах нь:

1. 2021 оны долоодугаар сарын 3-ний өдөр их эмч Б.Энхжаргал нь үйлчлүүлэгч Д.Рагчаадоржийн дуудлагаар очоод түүнд  түргэн тусламжийн үйлчилгээг үзүүлэлгүйгээр орхиж явсан. Оношлох, эмчлэх, яаралтай тусламжийн түгээмэл үйлчилгээний  стандартыг зөрчсөн, Эмчилгээ эрхэлсэн орлогч дарга С.Ариунболд нь ажлын байрны тодорхойлолтод заасан эмч нарын ажлын гүйцэтгэлд байнга хяналт тавиагүй, эмнэлэг үйлчилгээний гомдол гаргахгүй ажиллах үүргээ биелүүлээгүйн улмаас үйлчлүүлэгчийн амь нас хохирсон ноцтой зөрчил гаргасан тул долоодугаар сарын 5-ны өдрөөс тасалбар болгон ажлаас чөлөөлсүгэй.

Дарга Ц.Пүрэвдаш хэмээжээ.

Би үхэхээр чи үх гэгч л энэ буюу. Ажлын ноцтой алдаа гаргаж, хүний алтан амь эрсдээд байхад би, чи –дээ тулж, эцэстээ орлогч даргаараа туг тахиад өнгөрч байна. Угтаа бол хоёул хариуцлагаа хүлээж огцрох байлаа. Гэхдээ хожимдоогүй байна. Салбарын сайдынх нь суудалдаа байх эсэх асуудлыг хүртэл хөндөөд байгаа энэ цагт Ц.Пүрэвдаш дарга ч уснаас хуурай гарна гэдэг үгүй болов уу.

У.Тэргэл