Засгийн газар өнөөдөр ээлжит бусаар хуралдлаа. Засгийн газрын тэргүүн авлигын эсрэг Ажлын хэсгийг байгуулсан бөгөөд энэ талаар Ажлын хэсгийн ахлагч, Хууль зүй, дотоод хэргийн сайд Х.Нямбаатар мэдээлэл өглөө.
Тэрбээр “1995 оноос хойш улс орныг авлигын индексээр байр эзлүүлж ирсэн. Авлигын индексийг үзэхдээ 180 гаруй орны бүс нутгийн онцлогийг харгалзаж, хөндлөнгийн 13 төрлийн шинжээчид болон асуумжид үндэслэн гаргадаг. Манай улсын хувьд Берлинд төвтэй “Транспренси интернэшнл” байгууллагын авлигын индексийн үзүүлэлтээр 111 дүгээр байрт орсон. Ажлын хэсгийн өчигдрийн анхны хуралдаанаар 11-11 төв дээр иргэдэд төрийн албан хаагчдаас ирж байгаа хүнд суртал, шан харамж нэхэж байгаа талаар мэдээлэл авах, E-MONGOLIA апп дээр авлигын эсрэг тусгай цэс байрлуулна. Ажлын хэсгийн гол зорилго авлигатай тэмцэх төрийн байгууллагын ажлын уялдааг нэгтгэх, төрийн байгууллагынхны хүндрэл учруулж асуудалд цаг тухайд нь үнэлэлт өгч, тухай бүрд удирдлагад нь хариуцлага тооцох, хүний хүчин зүйлээс шалтгаалж, төрийн шийд гаргах байдлыг цахимжуулах ажлыг зохион байгуулна.
Зарим төрлийн хуульд мөн өөрчлөлт оруулна. Наймдугаар сард багтааж шүгэл үлээгчдийн тухай хуулийг яаралтай эцэслэж, УИХ-ын чуулганд өргөн мэдүүлэх үүрэг авлаа. Улс төрийн намуудын тухай хуулийг батлах цаг хугацаатай байгаа. Шинэ Үндсэн хуулийн нэмэлт өөрчлөлтийн хүрээнд 2028 оноос эхлээд улс төрийн намуудын бүтэц нийт сонгогчдын нэгээс доогүй хувийг өөртөө гишүүнчлэлтэй байхыг Үндсэн хуульд заасан. Үүнтэй уялдуулж, улс төрийн намуудын тухай хуульд өөрчлөлт оруулж, санхүүжилтийг тодорхой болгох улс төрийн хүрээний өөрчлөлт хийх хэрэгтэй байна. Ажлын хэсэг долоо хоног бүр хуралдаж, ажлаа Засгийн газарт мэдээлэх үүрэг авлаа.
Харин АТГ гэх бие даасан байгууллага байхад Ажлын хэсгийнхний ажил үүргийн давхцал болох юм биш үү гэсэн хэвлэлийнхний асуултад тэрбээр “АТГ-ыг 2006 онд байгуулсан. Тус байгууллага авлигын эсрэг гэрээ конвенцийг хэрэгжүүлэх, авлига албан тушаалын хэрэгт мөрдөн байцаалт явуулах үндсэн чиг үүрэгтэй. АТГ-ын хэрэг бүртгэл дээр тодруулбал, тус газрын ажилд бид хөндлөнгөөс оролцохгүй. Харин хүнд суртал үзүүлж байгаа байгууллагад хариуцлага тооцож, хууль эрх зүйн орчинг боловсронгуй болгоно. Төрийн болон орон нутгийн өмчит компанийн эрх зүйт байдлын тухай хуулийн төсөл санаачлах үүрэг авсан. 192 мянган төрийн албан хаагчдын давхардал хийдэл байна уу, төрийн байгууллага уялдаа холбоотой ажиллаж байна уу гэдэгт хяналт тавина гэсэн үг. Манай ажлын хэсэг өргөн хүрээтэй. Ерөнхий агуулгаар авлигын индексийг бууруулах, нөлөөлж байгаа хүчин зүйлүүд юу байна гэдэгт анхаарна. Авлигатай тэмцэх нь бүх хүний үүрэг. Тэр ч утгаараа 11-11 гэх Засгийн газрын утсан дээр иргэдээс төрийн хүнд суртал, чирэгдэл, авлига шан харамжтай холбоотой мэдээлэл авч, боловсруулалт хийж, эрүүгийн хэргийн шинжтэй бол АТГ-т шилжүүлж, сахилга хариуцлага ёс зүйтэй холбоотой асуудал байвал холбогдох арга хэмжээ авна” гэлээ.
