Олон улсын математикийн 62 дугаар олимпиадаас Монгол Улсын баг хоёр алт, хоёр мөнгө, хоёр хүрэл медаль хүртэж, багаараа дэлхийд 150 орноос 11 дүгээр байрт орж, бахдам амжилт үзүүллээ. Монгол Улсын багт:

-А.Нямдаваа - Алтан медаль (Сант сургууль)

-М.Өнөболд - Алтан медаль (Нэгдүгээр сургууль)

-Ц.Сайханбилэг - Мөнгөн медаль (Сант сургууль)

-О.Мишээл - Мөнгөн медаль (Шинэ Монгол сургууль)

-Д.Энэрэлт - Хүрэл медаль (Сант сургууль)

-Б.Батсамбуу -Хүрэл медаль (Олонлог төв) авсан бол багийн удирдагчаар Монголын математикийн олимпиадын хорооны дарга Б.Батбаясгалан, МУИС-ийн Математикийн тэнхмийн багш, Монголын математикийн олимпиадын хорооны гишүүн У.Батзориг нар ажилласан юм.

Токиогийн зуны олимп ид үргэлжилж байгаа энэ үед Олимпын хос алтан медаль авсантай дүйцэхүйц асар том амжилт үзүүлсэн тус багийнхнаар Монголын төр, засаг, ард иргэд бахархаж сууна.  Энэ удаад багийн удирдагч, Монголын математикийн олимпиадын хорооны дарга Б.Батбаясгалантай цөөн хором ярилцлаа.

-Багаараа бахдам амжилт гаргасанд баяр хүргэе. Олон улсын математикийн олимпиадад оролцох сурагчдыг хэчнээн жил бэлтгэж, ямар шалгуураар сонгож оролцуулдаг вэ?

-Жил бүрд зохион байгуулдаг математикийн олимпиад олон улсдаа ихээхэн нэр хүндтэй. Манай улсын хувьд  ерөнхий боловсролын сургуулийн бага, дунд ангийнхны дунд математикийн олимпиадыг байнга зохион байгуулж ирсэн. Тэдгээрээс сонгон шалгаруулж авч, хичээллэснээр сүүлийн жилүүдэд амжилтын хувьд арвин байгаа. Энэ удаад дэлхийн 150 орноос 11 дүгээр байрт орсон нь багийн ялангуяа багш, сурагчдын олон жилийн хөдөлмөрийн үр дүн гэж ойлгож болно. Олон улсын олимпиадад оролцоход хоёр шалгуурыг тавьдаг. Их, дээд сургуульд ороогүй байх, 20 нас хүрээгүй байх гэсэн. Энэ жилийн хувьд цар тахлаас болоод онлайнаар хичээллэсэн ч олимпиадад оролцсон зургаан сурагч маань бахдам амжилт үзүүлсэнд баяртай байна.

-Ер нь манай улсын амжилт олон улсдаа хаахна явдаг юм бэ?

-Дэлхийн 150 орноос 11 дүгээр байрт орно гэдэг маш том амжилт юм. Сүүлийн хэдэн жилд манай багийн амжилт тогтвортой явж ирсэн. Манайд долоодугаар ангидаа анх олимпиадад оролцон ах, эгч нартайгаа өрсөлдөн энэ жил тав дахиа оролцож байгаа хүүхэд ч байна.

-Медаль авсан сурагчдад ямар боломжийг олгодог вэ. Олимпиадад оролцоход манай улсаас дэмжлэг, туслалцаа үзүүлдэг үү?

-Медаль авсан тохиолдолд дэлхийн топ их, дээд сургуулиудад урилгаар суралцах эрхтэй болдог. Ялангуяа алтан медаль хүртсэн тохиолдолд. Миний санаж байгаагаар, 2010 онд алтан медаль авсан зургаан сурагч бүгд АНУ-ын их, дээд сургуульд урилгаар элссэн байдаг. Манай хороо Боловсрол, шинжлэх ухааны яамтай гэрээтэй ажиллаж, яамнаас сурагчдын хичээлийн болоод олон улсын олимпиадад оролцох  зардлыг даадаг. Үндсэн дэмжлэгийг үзүүлдэг гэсэн үг. Мөн Монголын математикийн олимпиадын хорооны Удирдах зөвлөлд “Анд глобал” компанийн гүйцэтгэх захирал Ч. Анар, М-Си-Эс группын дэд ерөнхийлөгч Д.Энхтүвшин, “Петровис”-ын захирал асан Оюунгэрэл,  МУИС-ийн математикийн тэнхимийн дэд профессор, доктор Г.Баярмагнай,  МУИС-ийн Математикийн Хүрээлэнгийн захирал, доктор Ү.Отгонбаяр нарын олон сайхан хүн багтаж, бүхий л талаар дэмжиж, тусалж, чиглүүлж ажилладаг.

-Саяын олимпиадад оролцсон хүүхдүүд төгсөх ангийнх. Тэдний халааг авах сурагчдаа бэлдэж амжсан уу?

-Харин нэг үеийн цикл дуусчихлаа. Бидний санааг зовоож байгаа асуудал энэ болоод байна. Тиймээс бид ирэх жилээс хөдөө, орон нутаг руу чиглэж, бүсийн олимпиадыг зохион байгуулахаар төлөвлөөд байна. Алсуураа хийж байгаа ажил юм.

-Монголын математикийн олимпиадын хорооны цаашдын том зорилго юу байна вэ?

-Олон улсын математикийн олимпиадыг Монгол Улсад зохион байгуулахад төвлөрч байна. Удирдах зөвлөл олон улсын зохион байгуулах хороонд хүсэлтээ явуулах бэлтгэл ажлаа хангаж эхэлсэн. Хүүхдүүд, дагалдах багш нар, албаныхан гээд 800 гаруй хүнтэй томоохон үйл ажиллагааг зохион байгуулах тийм амар биш. Бас нэгэн тээг байгаа нь Олон улсын математикийн олимпиад түүхэндээ ганцхан удаа  өнжсөн байдаг. Энэ нь Монгол Улстай холбоотой. Учир нь, 1980-ад оноос социалист гэгдэх орнуудад уг олимпиадыг зохион байгуулж, яваандаа барууны орнууд орж ирсэн байдаг. Харин Монгол Улс  тухайн үед зохион байгуулна гэчихээд ямар шалтгааны улмаас гэдэг нь тодорхойгүйгээр өнжсөн байдаг. Дараа нь 1990-ээд оны үед бас нэг яригдаад таг чиг болсон. Энэ бүхнийг цайруулах шаардлага байгаа юм. Манай давуу тал гэвэл, олон улсад эхний аравт орж байгаа үзүүлэлтээрээ илүүрхэнэ.

-Монголд хэдийд зохион байгуулахаар төлөвлөж байгаа вэ?

-2027-2028 он хавьцаа байх.

-Тийм хол уу?

-Олон улсын математикийн олимпиадыг зохион байгуулах орныг эртнээс тодруулдаг. Тухайлбал, 2022 онд Норвеги, 2023 онд Япон, 2024 онд Украйн, 2025 онд Австрали зохион байгуулахаар болсон. Манай улс хүсэлтээ өгөөд зөвшөөрвөл энэ хугацаанаас хойш болохоор байгаа юм. 

-Баярлалаа.

У.Тэргэл