Шатахууны асуудлаар холбогдох байгууллагууд мэдээлэл хийж байна.

Уул уурхай, хүнд үйлдвэрийн сайд Г.Ёндон "Сүүлийн өдрүүдэд шатахууны үнэ, хомсдлын талаарх мэдээлэл олны анхаарлыг татаж байна. Манай улс нийт сарын 38-40 мянган тонн АИ-92 бензин хэрэглэдэг. Үүнийхээ 95 орчим хувийг ОХУ-аас, 5-10 хувийг БНХАУ-аас нийлүүлдэг. 

Бид ОХУ-аас гэрээгээр харилцан үүрэг хүлээж, шатахуунаа авдаг. ОХУ-аас өнгөрсөн сарын сүүлчээр сард нийлүүлэх ёстой 28 мянган тонн АИ 92 бензин нийлүүлэх боломжгүй гэдгээ мэдэгдсэн. Найм, есдүгээр сард Ангарскийн үйлдвэрт засвар хийж байгаа, мөн коронавирусний халдварын улмаас гэрээгээр хүлээсэн шатахуунаа нийлүүлэх боломжгүй. Харин 17 мянган тонн бензин нийлүүлнэ гэсэн мэдэгдэл өгсөн. 

Тиймээс бид шатахуунаа хэвийн хэмжээгээ хангахын тулд БНХАУ-ын China oil компанитай гэрээ хийсэн. Таван ААН гэрээ хийж, сар гарангийн нөөцийн мөнгөө төлсөн. Наашаа зөөх галт тэрэгнийхээ кодыг ч авсан байсан.

Гэтэл өчигдөр өглөө ОХУ-аас аравдугаар сарын нэгэн хүртэл 90-10 мянган тонныг нийлүүлэх боломжгүй гэдээ гэнэт мэдэгдлээ.

Мөн БНХАУ-ын Боловсруулах үйлдвэрээс төмөр замд вагон тавих боломжгүй гэж мэдэгдсэн. Учир нь улсын төмөр зам ихээхэн ачаалалтай ажиллаж байгаа юм байна. Хоёр улсаас шатахуун авдаг тул манай ААН-үүд борлуулалтдаа хязгаарлалт хийж эхэллээ. Энэ нөхцөл байдлаа өнөөдөр бид БНХАУ-ын Элчин сайдад уламжилж, хүсэлтээ тавиад байж байна.

Өнөөдрийн байдлаар сар гарангийн нөөц болох 1037 вагоны шатахууны мөнгөө төлсөн ч авч чадахгүй байна. Үүнийг нааш нь татах талаар бид бүхий л арга хэмжээг авч ажиллаж байгаа.

Засгийн газрын журам гарган, 30 мянган тонн нөөц бүрдүүлэх шийдвэр гаргасан. Улс өөрийн нөөцтэй байх ёстой. Шатахууны үнийн эрсдэлээс хамгаалах сантай болно. Цар тахлын дараах эдийн засгийг сэргээх хуульд энэ сангийн талаар тусгасан. Хуулийн төслийг намрын чуулганаар хэлэлцэнэ. Энэ сан зэх зээлийн зарчмаар ажиллана. Төрийн хатуу зохицуулалт үйлчлэхгүй" гэлээ.  

Б.Баатар