Нийслэлийн ИТХ 2012 оны 9-р сарын 13-нд ээлжит бус хуралдаанаараа “Газрын харилцаа, хот төлөвлөлт, барилгажилтад гарч  буй зөрчлийг таслан зогсоож, цаашид авах  арга хэмжээний тухай” тогтоолын төслийг хэлэлцсэн юм. Тогтоолын төсөлтэй холбогдуулан НИТХ дахь Ардчилсан нам, МАН, “Шударга ёс” эвслийн бүлгүүд  байр сууриа нэгтгэсэн байна. Тухайлбал,  АН-ын бүлэг “Улаанбаатар хотод шинээр газар эзэмшүүлэх, ашиглуулах, өмчлүүлэх  эрх олгох , барилга байгууламжийн  ажлыг эхлүүлэх, өргөтгөхийг хориглох 1300 га газрын хил хязгаарыг энэ тогтоолын нэгдүгээр хавсралтад зааснаар тогтоосугай” гэснээс   “барилга байгууламжийн ажлыг эхлүүлэх, өргөтгөхийг хориглох” гэдгийг хасах нь зүйтэй зэрэг хэд хэдэн санал гаргаж, санал хураалтаар шийдвэрлүүллээ.Төлөөлөгчдийн гаргасан саналын дагуу хамгааалт тогтоох 1300 га газар дээр Үндэсний цэцэрлэгт хүрээлэн, Хүүхдийн паркийг нэмж, хүрээг нь өргөтгөлөө. “Шударга ёс” эвслийн хувьд зөвшөөрөлгүй барилга баригддаг өнөөдрийн нөхцөлийг таслан зогсоохын тулд газар, барилга барихыг цэгцлэх  гурван  журам нэн даруй  гаргах ёстой гэж байв. Бүлгүүдийн байр суурийг  сонссоны дараа санал хураалт явуулж тогтоолыг баталлаа.
   Нийслэлийн нутаг дэвсгэрт орон сууц, олон нийтийн барилга байгууламж орчмын нийтийн эзэмшлийн зам талбай, сургууль, цэцэрлэг,  эмнэлгийн эдэлбэр газар авто замын улаан шугам, инженжерийн байгууламж, шугам сүлжээний хамгаалалтын бүсэд болон барилгын норм дүрэм зөрчиж олгосон газар эзэмшүүлэх, ашиглах эрх, барилга байгууламж барих зөвшөөрөл болон хотын суурьшлын бүсийн инженерийн шугам, сүлжээ бүхий болон сүлжээнд холбогдохоор төлөвлөгдсөн газруудад дүүргүүдийн  Засаг даргын газар олгосон шийдвэрүүдийг хүчингүй болгох заалт оржээ.
   Тогтоол зөвхөн хууль зөрчиж баригдаж байгаа барилгуудтай холбоотой. Түүнээс биш хуулийн дагуу үйл ажиллагаа нь явж байгаа компаний үйл ажиллагаанд хутгалдан орохгүйгээр энэ салбарыг зохицуулахаар батлагдан гарлаа. Барилга барих зөвшөөрөл авахад холбогдох албан тушаалтнуудаас 128 гарын үсэг,   зөвшөөрөл авдаг. Зөвшөөрөл өгөх учиртай байгууллага, албан тушаалтан тухайн зөвшөөрлийг хэд хоногийн дотор, хэрхэн яаж олгохыг тодорхой болгох, олон шат дамжлага, зөвшөөрлийн тоог цөөрүүлэх талаар тодорхой санал боловсруулан яаралтай ажил хэрэг болгохыг НИТХ-ын төлөөлөгчид анхаарууллаа. НИТХ-ын гурав дугаар хуралдаан дээр 2003 оноос хойш газрыг дуудлагаар худалдах ёстой байсан. Гэвч өнгөрсөн хугацаанд газрын дуудлага худалдаа зохион байгуулагдаагүй. Засаг даргын захирамжаар тухайн зөвшөөрөл олгогдож байсан байна. Захирамжаар олгогдсон газрын хэмжээг тогтоон тэдгээрийг дуудлага худалдаа зохион байгуулж олгосон бол нийслэлийн төсөвт хэдэн төгрөгийн орлого төвлөрөх байсныг тогтоож, түүнийг нийслэлийн хохирол хэмээн тооцож тухайн үед ажил хариуцаж байсан хүмүүсээс нэхэмжлэх хэрэгтэй гэсэн санааг төлөөлөгч Ц.Энхцэнгэл хөндөж байв.
НИТХ-ын ээлжит бус гуравдугаар хуралдаан “Газрын харилцаа, хот төлөвлөлт, барилгажилтад гарч буй зөрчлийг таслан зогсоох, цаашид авах арга хэмжээний тухай” тогтоолын төслийг хэлэлцэж баталлаа. Энэ тогтоол батлагдсанаар НИТХ-аас 8-р сард баталсан “Улсын болон нийслэлийн төсвөөр баригдахаас бусад тохиолдолд барилгын ажлыг эхлүүлэхгүй байх” тухай тогтоолыг хүчингүй болголоо. Ингэснээр зөвшөөрлөө албан ёсоор хуулийн дагуу авсан компани, аж ахуйн нэгж барилгаа эхлүүлэхэд ямар нэг хориг саадгүй боллоо.