Монгол Улс Ардчилсан орнуудын хамтын нийгэмлэгийн дарга орны хувиар НҮБ дахь Ардчиллын бүлгийн орнуудын Сайд нарын албан бус уулзалтыг энэ сарын 25-нд зохион байгуулжээ. Энэ удаагийн уулзалт “Хуулийг хэрэгжүүлэх ёсон ба ардчилал” сэдвээр өрнөсөн байна. Уулзалтыг Монгол Улсын Ерөнхийлөгч Ц.Элбэгдорж нээж үг хэлээд “Илүү эрх чөлөөтэй, илүү ардчилсан, бас илүү шударга нийгмийг хамтдаа бүтээхийн төлөө хамтран ажиллая” хэмээн бусад орнуудад уриалсан байна.
Уулзалтыг Гадаад харилцааны сайд Л.Болд даргалж, НҮБ дэх ардчиллын бүлгийн 100 гаруй орон, НҮБ болон олон улсын бусад байгууллагын удирдлага оролцсоноос 19 орны Гадаад хэргийн сайд байлцсан байна. Мөн Литва, Финлянд, Румын, Унгар, Бенин, Морокко, Тунис, Тайланд, Солонгос зэрэг орны сайд нар, АНУ, Франц, Испани, Эстони, Итали, Уругвай зэрэг 20 шахам орны төлөөлөгч, НҮБ-ын Хүний эрхийн асуудал хариуцсан Туслах нарийн бичгийн дарга Иван Симонович, НҮБ-ын Ардчиллын сангийн Гүйцэтгэх захирал Роланд Рич, Ардчилал, сонгуулийн туслалцааны олон улсын хүрээлэнгийн Ерөнхий нарийн бичгийн дарга Видар Хелгесен, АОХН-ийн иргэний нийгмийн асуудлаарх олон улсын удирдах зөвлөлийн дарга Мортон Халперин нар үг хэлэв. Төлөөлөгчид Монгол Улс АОХН-ийн үйл ажиллагааг идэвхтэй явуулж байгааг онцлон тэмдэглэж, талархал илэрхийлсэн байна.
