АНУ-ын Оклахома хотын оршин суугч 60 настай Нелли Дэвисын цогцсыг орон нутгийн цагаар лхагва гаригийн 11.30 цагийн орчимд зээ охин нь олж, цагдаад мэдэгдсэн байна.

Эмэгтэйг тэжээвэр нохойндоо бариулан амиа алдсаныг шинжээчид тогтоосон байна. Нас дээр гарсан Нелли Дэвис питбулл үүлдрийн хоёр том нохой тэжээдэг байсны нэг нь өөрийнх нь аминд халдсан аж.

Цагдаа нар нохдыг амьтны торонд хийн авч явахыг оролдох үед нэг нь тэдэн рүү дайрч, буудуулсан байна. Харин эзнээ хөнөөсөн нохойг “Бурлесоны амьтны хяналтын газар”-т амь тариа хийн хороожээ.

АНУ-д тэжээвэр нохой нь эзэн рүүгээ халдсан иймэрхүү хэрэг цөөнгүй гардаг бөгөөд тэдгээр нохдыг амь тариа хийн хороодог байна. Энэ долоо хоногийн эхээр Техас мужид бас нэгэн айлын тэжээвэр питбулл гурван сартай хүүг барьсан хэрэг гарсан юм. Тэрхүү нохой гэнэт орон дээрээ хэвтэж байсан нярай хүү рүү дайрч, түүнийг хазсан байна.