Ирэх оны төсвийн тухай хуулийн Соёлын сайдын багцад Богд Зонхова бурхны хөшөөг барихад зориулан 32 тэрбум төгрөг төсөвлөсөн. Цар тахлын энэ үед хөшөөнд ийм их хөрөнгө төсөвлөснийг олон нийт үргүй зардлаар нэрлэн, дургүйцлээ илэрхийлээд байгаа. Ингэж олны дургүйцлийг төрүүлээд байгаа энэхүү 32 тэрбум хэний саналаар төсөвт тусгасан гэдэг нь өнөөдрийг хүртэл “нууц” сэдэв болоод байна. Тодруулбал, анх төсөвлөхдөө таван тэрбум байсан Бурханы хөшөө батлагдсан төсөвт 32 болж нэмэгдэж орж ирсний цаад эзэн нь олдохгүй байгаа юм.

Нэгэнт батлагдсан Төсвийн хуулийг өөрчлөх хоёр л арга байгаа. Нэг нь Төсвийн тухай хуульд нэмэлт, өөрчлөлт оруулах, нөгөө нь Ерөнхийлөгч хориг тавих. Ерөнхийлөгчийн хориг хуулийн хугацаатай бөгөөд УИХ-ын баталсан аливаа хууль, тогтоолыг УИХ-ын дарга ёсчлон Ерөнхийлөгчийн Тамгын газар хүргэснээс хойш ажлын таван өдрийн дотор шийдэх хуулийн хугацаатай. Энэ хугацаанд Монгол Улсын төрийн тэргүүн УИХ-ын баталсан хууль тогтоолд бүхэлд нь болон хэсэгчлэн хориг тавих эрхтэй байдаг.

Тэгвэл 2022 оны Монгол Улсын төсвийн тухай хуульд Ерөнхийлөгч хориг тавих эсэх хуулийн хугацаа маргааш буюу 2021 оны арванхоёрдугаар сарын 1-нд дуусч байгаа юм. Монгол Улсын Ерөнхийлөгч У.Хүрэлсүхийн хувьд тангараг өргөснөөсөө хойш УИХ-ы. Баталсан хууль, тогтоолд хориг тавиагүй байгаа. Ирэх оны төсвийн тухай хуульд хориг тавьбал зургаан жилээр сонгогдсон төрийн тэргүүний анхны хориг болох юм.

УИХ-ын чуулганы хуралдааны дэгийн тухай хуульд зааснаар УИХ Ерөнхийлөгчийн хоригийг хүлээж авснаас хойш дараалал харгалзахгүйгээр тэргүүн ээлжид, ажлын 14 хоногийн дотор нэгдсэн хуралдаанаар хэлэлцдэг. Харин Ерөнхийлөгчийн хоригийг хуралдаанд оролцсон нийт гишүүний гуравны хоёр нь хүлээн аваагүй бол уг хууль, хуулийн заалт хүчин төгөлдөр үлддэг билээ.

О.Балдан-Очир