Монгол Улс, ОХУ хооронд дипломат харилцаа тогтоосны 100 жилийн ой энэ онд тохиож байна. Энэ хүрээнд цэргийн гарамгай жанжин, ЗХУ-ын дөрвөн удаагийн баатар, БНМАУ-ын баатар, ЗХУ-ын маршал Г.К.Жуковын Халхын голын байлдаанд Зөвлөлт-Монголын хамтарсан Армийн I бүлгийг командлан ялалт байгуулж, манай улсын тусгаар тогтнол, газар шорооны бүрэн бүтэн байдлын төлөө байгуулсан гавьяаг өнө мөнхөд бахархан, залуу хойч үедээ таниулах зорилготой арга хэмжээг Улаанбаатар дахь Оросын шинжлэх ухаан, соёлын төвд зохион байгуулах гэж байна. Уг арга хэмжээнд БХЯ-ны удирдлага, газрын дарга нар, БХЯ-ын харьяа байгууллагууд, ОХУ-аас Монгол Улсад суугаа ЭСЯ-ны цэргийн аттеше, хэвлэлийн атташе, Бүгд Найрамдах Беларусь Улсаас Монгол Улсад суугаа Элчин сайд, Беларусь Улсын Өргөмжит Консул, Бүгд Найрамдах Казахстан Улсаас Монгол Улсад суугаа Элчин сайдын I нарийн бичгийн дарга, Соёлын яамны дэд сайд, ЕБС-ийн багш сурагчид, музейн ажилтан алба хаагчид, “Монгол Хурандаа” нийгэмлэг, ахмад дайчдын төлөөлөл, хэвлэл мэдээллийн ажилтнууд оролцох юм. Өнөөдрөөс эхлэн ОШУСТ-ийн зочид ЗХУ-ын маршал Г.К.Жуковтой холбоотой гэрэл зургийн үзэсгэлэн, "Г.К.Жуков сонины хуудаснаа....", "ЗХУ-ын маршал Г.К.Жуковын хувийн хэргийн баримт материалаас...." сэдэвт архивын хосгүй эх баримтаар дэглэгдсэн үзэсгэлэнг хүрэлцэн ирж үзэхийн сацуу "ЗХУ-ын маршал Г.К.Жуковт зориулсан хөшөө дурсгалууд"-тай танилцах боломжтой.