МОНГОЛ УЛСЫН ХАРЦАГА ЧОЙНХОРЫН ЧУЛУУНБААТАР

Увс аймгийн Тэс сумын харьяат, Монгол улсын харцага Чойнхорын Чулуунбаатар 2021 оны 12 дугаар сарын 11-ний өдөр нас нөгчиж, нөхөж баршгүй гарз тохиолоо. Ч.Чулуунбаатар 1973 оны нэгдүгээр сарын 11-нд, хулгана жилд Увс аймгийн Тэс сумын нутагт төржээ. Тэрээр бага залуу наснаас үндэсний бөхөөр хичээллэж 19 насандаа аймгийн начин цол хүртсэн бөгөөд 1997 онд ардын хувьсгалын 76 жилийн ойн их баяр наадмаар улсын заан С.Сүхбаатар, улсын арслан Ж.Хайдав, дархан аварга Х.Баянмөнх, улсын заан Ч.Бямбадорж нарыг өвдөг шороодуулан, төрийн их баяр наадмын дунд шөвөгт шалгарч "Улсын өсөх идэр начин" цолд хүрчээ. Энэ амжилтаа хожим 2004 онд үнэлүүлж "Монгол улсын харцага" цол хүртсэн юм. Мөн харцага маань 1995 онд болсон Өндөр гэгээний түмэн өлзий гийсний ойн даншиг наадамд тухайн үеийн залуу заан Г.Өсөхбаяраар тав даван шөвгөрсөн болон "Улаанбаатар сонин"-ы нэрэмжит барилдаанд түрүүлж явснаа бахархан дурсдаг байлаа. Тэрээр баруун талтай, хонгодох, суйлах, хавсрах, хутгах, давхар ачих, тохох, тонгорох мэхийг даалган хийж барилддаг, арал чац сайтай, жин хүндтэй, биеэ сайн сулладаг онцлогтой бөх байв. Талийгаачийн гэгээн дүр төрх, ажилч хичээнгүй зан чанар, Монгол бөхийн түүхэнд гаргасан амжилт бид бүхний зүрх сэтгэлд үүрд хоногшин үлдэх болно. Талийгаачийн гэр бүл, үр хүүхдүүд, ахан дүүс, төрөл төрөгсдөд гүн эмгэнэл илэрхийлье.