Үндсэн хуулиараа улсаа гадаад харилцаанд төлөөлөх бүрэн эрх бүхий Монгол Улсын Ерөнхийлөгч У.Хүрэлсүх анхны айлчлалаа ОХУ-д хийж байна. Өчигдөр албан ёсоор эхэлсэн тус айлчлалын үр ашгийн талаар үл дурдаад энэ айлчлал албан ёсных уу, эсвэл ажлынх уу гэдэг маргаан нийгэмд өрнөлөө. Монгол Улсын Ерөнхийлөгчийн албан ёсны хуудсаар гаргаж байгаа мэдээллүүдэд төрийн тэргүүний хойд хөршид хийж байгаа айлчлалыг “албан ёсны” гэж тодотгож буй. Харин Ерөнхийлөгчийн айлчлалын бүрэлдэхүүнд багтсан УИХ-ын гишүүн Д.Өнөрболорын өөрийн сошиал хуудсанд тавьсан мандат дээр “Рабочий визит Президента Монголий У.Хурэлсуха В Российскую Федерацию” гэсэн байсан нь энэ маргааныг эхлүүлсэн билээ.
Эхлээд Монгол Улсын Ерөнхийлөгчийн айлчлал ямар ангилалтай байдгийг уншигчдад сонирхуулъя. Монгол Улсын төрийн ёслолын журамд зааснаар төр засгийн удирдагчдын гадаадад хийх айлчлалыг төрийн, албан ёсны, ажлын, хувийн гэж ангилдаг. Төрийн айлчлалыг зөвхөн Монгол Улсын Ерөнхийлөгч хийдэг. Ерөнхийлөгчийн гадаад улсад хийх төрийн болон албан ёсны айлчлалд түүний гэргий, албан ёсны болон ажлын хэсэг, хамгаалалт үйлчилгээний 21 хүртэл хүн дагалдаж явж болдог. Гэхдээ энэ тоо нь тухайн цаг үеийн нөхцөл байдлаас шалтгаалан өөрчлөгдөж болохоор журамласан байдаг юм. Харин Ерөнхийлөгчийг гадаадад ажлын айлчлалаар явахад гэргий дагалдахгүй, албан ёсны болон ажлын, хамгаалалт үйлчилгээний хэсэг бүгд 18 хүртэл хүний бүрэлдэхүүнтэй явдаг.
Айлчлалын албан ёсны нэр, хөтөлбөрийг Гадаад харилцааны яам нөгөө талтай урьдчилан тохиролцоно гэдгийг энэ журамд зааж өгсөн байдаг. Гадаад харилцааны яамны албан хуудсанд “Монгол Улсын Ерөнхийлөгч У.Хүрэлсүх ОХУ-д албан ёсны айлчлал хийхээр тус улсын нийслэл Москюа хотноо хүрэлцэн ирэв” гэж мэдээлсэн байхыг үзвэл төрийн тэргүүний анхны айлчлалыг “Албан ёсны” гэсэн ангиллаар хоёр тал тохирсон гэдэг нь харагдаж байна. Тэгэхээр төрийн тэргүүний ОХУ-д хийж байгаа айлчлал албан ёсны айлчлал.
О.Балдан-Очир
