Монгол Улсын Ерөнхийлөгч У.Хүрэлсүхийн зарлигаар соёлын гавьяат зүтгэлтэн цол, тэмдгээр шагнуулсан МҮОНРТ-ийн тоймч Ж.Алтангэрэлийн сэтгэгдлийг хүргэе. Тэрбээр “Миний өсөж өндийсөн төрөлх нутаг арын сайхан Архангайн өлзийтэй нутаг ус, малчин олон маань намайг үргэлж түшиж явдаг. Миний ах намайг Монголын радио гэх том айлын босгоор хөтлөн оруулж, нэгэн үеийн том уран бүтээлчидтэй уулзуулж байсан нь миний сэтгүүл зүй, сэтгүүлчийн амьдралын эхлэл юм. МҮОНРТ-ийн үе үеийн хамт олон, уран бүтээлчдийн халуун сэтгэл, дэмжлэг, ханийн минь түшиг тулгуур, урмын үг хайрладаг жирийн үзэгчийн сайхан хандлага надад сэтгүүл зүйн салбарын хөлөө олох, чигээ олох зам мөрийг минь үргэлж зааж, дэм болдог юм.

Дэлхийн тавцанд Монгол хэмээх туурга тусгаар улс байгаа цагт МҮОНРТ-ийн алтан цамхаг үргэлж өөдөө байна гэдэгт эргэлздэггүй. МҮОНРТ бол Монгол Улсын түүх юм. Энэ түүх тасрах ёсгүй. Миний хувьд ардчилсан он жилүүдэд байгуулагдсан Монгол Улсын УИХ-ын найман удаагийн сонгуулийн долоод нь сэтгүүлчээр ажиллаж байна. Парламентийн үе үеийн сэтгүүлч, зураглаач, гэрэл зурагчид бол төрийн түүхийг бүтээдэг. Хэдий үзэгний үзүүр хөдөлж, алтан микрафон асах бүрийд Монголын төрийн түүх тасрахгүй. Сэтгүүл зүй зөв орших, зөв байх мөч бүхэнд эрүүл төр тогтдог. Эрүүл зөв нийгэм оршдог. Монголын сэтгүүл зүйн өмнө мэхийе. Өчүүхэн надад цолоо хайрласан төар, түмэн танаа мэхийн мөргөе. Баярлалаа, та бүхэнд” хэмээн хэллээ.

Б.Жаргал