НҮБ-ын хүний эрхийн зөвлөлийн шинэ гишүүн орнуудыг тодруулах нууц санал хураалтыг ерөнхий ассамблейн чуулганы үеэр зохион байгуулжээ. Нэрээ дэвшүүлсэн улсуудаас 12 улс НҮБ-ын гишүүн орнуудаас хамгийн олон санал авснаар зөвлөлд сонгогдсон байна. Тухайлбал:

1. Алжир,
2. Бангладеш,
3. Бельги,
4. Чили,
5. Коста-Рика,
6. Гүрж,
7. Киргизстан,
8. Мальдив,
9. Морокко,
10. Румын,
11. Өмнөд Африкийн БНУ,
12. Вьетнам 

Өмнөд Солонгос, Венесуэл улсууд зөвлөлд дахин сонгогдохоор нэрээ дэвшүүлсэн ч хангалттай санал авч чадалгүй хасагдсан байна.

Дэлхий дахинд хүний эрхийг хамгаалах, сайжруулах үүрэгтэй зөвлөл нь НҮБ-ын гишүүн орнуудын нууц санал хураалтаар сонгогдсон 47 улсаас бүрддэг. Төв нь Швейцарын Женев хотод байрладаг юм.

Өчигдөр нэрээ дэвшүүлсэн орнуудаас Өмнөд Африкийн БНУ хамгийн олон буюу 182 саналаар сонгогджээ.

Ази, Номхон далайн орнуудаас Бангладеш 160, Мальдив 154, Вьетнам 145, Киргизстан 126, Өмнөд Солонгос 123, Афганистан 12, Бахрейн 1, Монгол 1 санал тус тус авсан байна.

Монгол Улс нэг санал авсан тухай жиргээчид жиргээд эхэлжээ. Тухайлбал, "Афганистан 12 санал авчээ. Биднийг хүний эрх хамгаална гэж нэг улс л итгэж", "Өөрийн нэг санал" хэмээжээ.