Залуу хосууд бие биедээ сэтгэлтэй л байвал амьдралыг сайхан гэж боддог. Харин энэхүү бидний хайр сэтгэл хэдэн жилийн настай байх бол хэмээн бодож тунгаах явдал бараг үгүй.
Залуу хосууд бие биедээ сэтгэлтэй л байвал амьдралыг сайхан гэж боддог. Харин энэхүү бидний хайр сэтгэл хэдэн жилийн настай байх бол хэмээн бодож тунгаах явдал бараг үгүй. Дурласан хүн хайртынхаа бүх алдаа оноог зөвтгөж ариун сайхан бүхэнтэй зүйрлэж сэтгэлээ баясгадаг. Яг ийм л үед хайртай хосуудын хамтран амьдрах сонирхол маш их оргилдог бололтой. Учир нь сүүлийн үед гэрлэлтийн байдал улам залуужиж, залуу гэр бүлийн тоо өссөөр байна. Энэ нь нэг талдаа сайхан санагдаж байгаа боловч нөгөө талаасаа асар их хариуцлагаас гардаг муу үр дагаварын үндэс болдог. Бие биенээ сайн таньж мэдэрч амжаагүй тэд бүхнийг сайхнаар төсөөлөн амьдралыг амархан мэтээр санаж хурим найр хийн гэр бүл болохыг яардаг.

Гэтэл тэд наад захын гэр бүлийн зөрчилдөөнийг давах чадваргүйн улмаас нэгнийгээ гомдоон салж сарних явдал цөөнгүй гаргана. Хүн болгон ийм азгүй амьдралаар амьдрахыг хүсэхгүй нь мэдээж. Тиймээс залуу хосууддаа тусламж болох үүднээс дараах бяцхан зөвлөмжийг хүргэе.
Манай монголчууд эрт дээр үеэс өрх тусгаарлахыг төрийн ёсны эрхэм нэгэн зүйлд тооцон хүндлэн дээдэлдэг билээ. Тийм ч үүднээс гэр бүл болох гэж буй хос залуусын хооронд сүй тавих ёслолыг хийж тодорхой хугацаанд амьдралаа эхлэхэд бэлэн эсэхийг нь харж шалгадаг байжээ. Yнэхээр хайртай хүнтэйгээ суухыг хүсэж байвал санаа сэтгэлээ зөвхөн түүндээ л зориулж чаддаг байх хэрэгтэй бөгөөд энэ чанар хэзээ ч хувиршгүй юм. Хөлгийн сайныг унаж байж мэддэг хүний сайныг ханилж байж мэддэг гэдэг шиг насан туршийн ханиа сайн таньж мэдэх нь таны төсөөлдөг аз жаргалтай амьдралын чинь түлхүүр байгаа биз дээ. Гаднах өнгөнд итгэж хүнийг дүгнэх явдал нь харанхуйд гэрлийн унтраалгыг хайж бүдчиж яваатай ижил юм.
Тиймээс гэр бүл болж амьдралаа эхлэх гэж байгаа залуу хосууд маань хань болох хүнээ сайтар шалган сонжих хэрэгтэй. Тухайлбал, та хайртыгаа юунд илүү баярладаг болон ямар зүйлд гомддог эсэхийг жижиг зүйлүүдээр туршиж болно. Түүнчлэн түүний зан ааш амьдралын хэцүү үеүдэд болон уурлаж бухимдсан үедээ хэрхэн өөрчдөгддөг зэрэг нь сонжооны нэг хэсэг болно. Тэр ч байтугай та түүнийг бяцхан зүйлээр гомдоож үзэх хэрэгтэй. Учир нь энэ үед хайр чинь таныг үнэхээр үзэн ядаж хэзээ ч уучлахгүй гэвэл та түүнийг зөнгөөр нь орхи. Цаашдын амьдралд чинь үүнээс илүү юм тохиолдоход тэр таны аврагч болохгүй. Тиймээс залуучууд маань хүний сэтгэлийг олон талаас нь харж байж дараа нь гэрлэх асуудлаа шийдээрэй.