Өвөрхангай аймагт нэр дэвшсэн нэр дэвшигчдийн маргаан өчигдөр эцэслэн шийдэгдсэн. СЕХ хуралдаж, АН-ын гишүүн Г.Батхүү, Д.Зоригт нарын тангарагыг өргүүлэхээр болж, МАН-ын гишүүдийг нэрсийг хассан билээ. Тиймээс өнөөдөр МАН-ын удирдах зөвлөл хуралдаж, хуралдааны дараа сэтгүүлчдэд мэдээлэл хийсэн юм. Намын дарга Ө.Энхтүвшин “Энэ бол Монгол Улсад ардчилал байхгүй болсны том жишээ. Цөөнхийг дарамталж байна. Олонх өөртөө зориулж хэм хэмжээ тогтоож байна. Нэг ёсны Өвөрхангай аймгийн сонгогчдын эрхийг зөрчиж, сонголтыг уландаа гишгэж байна. Н.Төмөрхүү, С.Чинзориг нар зөвхөн тангаргаа өргөхөө хүлээж байсан. Гэтэл СЕХ шүүхийн шийдвэрийг хүлээнэ, дээд шүүхэд хандана гээд өнөөдрийг хүртэл өргүүлээгүй. Тэгээд гэнэтхэн л АН-ын гишүүдийг тангараг өргүүлнэ гээд шийдчихлээ. Өчигдөр ийм шийдвэр гаргахаар нь уулзах гэтэл биднээс зугатаж гараад, орой 20.00 цагийн үед УИХ-ын даргад танилцуулсан байгаа юм. Тиймээс бид цаашид УИХ-ын даргатай уулзана. Бүр болохгүй бол Ерөнхийлөгчтэй уулзана” гэв. Мөн хурлын үеэр энэ бүх шударга явдлын төлөө эрс тэмцэнэ. Түүнчлэн жагсаал зохион байгуулахаа мэдэгдлээ.
Н.Төмөрхүү, С.Чинзориг нарыг сонгуулийн сурталчилгаанд насанд хүрээгүй хүүхэд ашигласан хэмээн буруутгаж байгаа.
Харин хурлын үеэр сонгуулийн сурталчилгаанд ажилласан гэх Б.Сэлэнгэ, Н.Булганаа нар ирсэн байлаа. Тэд “Харамсалтай хэрэг гарсан талаар дуулсан. Бид сонгуулийн сурталчилгаанд ажиллаагүй. Манай найзууд ажиллаж байсан. Найзууд дээрээ очоод байсан маань буруудчихлаа. Миний зураг гээд нэг зураг үзүүлсэн. Би тэр зурган дээрх хүн биш. Би сонгуулийн хувцас хунарыг нь ч өмсөөгүй шүү дээ. Бид сонгуулийн сурталчилгаанд ажиллаагүй гэдгээ албан ёсоор мэдэгдэж байна. Уг нь би ажиллаагүй. Намайг гүтгэж байна гээд гомдол гаргасан ч хүлээж аваагүй” гэлээ.
Б.Чимэг
Сэтгэгдэл (11)