Хятадын Хэнань мужид Чингис хааны удмын 5000 гаруй хүн амьдарч байгааг хятад, өвөр монгол эрдэмтэд баталжээ. Тэд аравдугаар сарын 19-нд болсон эрдэм шинжилгээний хурлаар Хятадын төв нутагт амьдардаг хүмүүс яагаад монголчуудын удам болсон тухай илтгэл тавьсан нь олон нийтийн анхаарлыг татаад байна.

    Хятадын Нийгмийн шинжлэх ухааны академийн эрдэмтэн До Рунгун, Нанхай их сургуурийн профессор Ли Зи, Өвөр Монголын их сургуулийн профессорууд гээд таван эрдэмтэн энэ судалгааг  20 гаруй жил хийсний эцэст Хэнань мужид амьдарч байгаа Шиао овогт 5000 хүн Чингис хааны ургийн хүмүүс болохыг тогтоосон гэж Chinadaily.org сайт мэдээллээ. Тэд судалгаа хийхдээ эдгээр иргэдийн ургийн бичиг болон зарим түүхийн эх сурвалжуудыг ашигласан байна.

   Шиао нар нь Монгол газраас ирсэн монгол язгууртнууд, тодруулбал,  Хятадад дайлаар ирсэн Чингис хааны том хүү Зүчийн хүү Бат хаан, түүний цэргүүдийн хойч үе, үр сад аж. Өмнө нь тэд монгол өвөг дээдсийнхээ талаар мэр сэр сонсож, ярьдаг байсан ч монголчууд тэдний өвөг гэдгийг нотлох баримт байдаггүй байсан гэнэ. Энэ  хууч ярианы мөрөөр эрдэмтэд мөшгөсөн бөгөөд Шиао овогтнуудын гэрт олон зуун жил хадгалагдсан ургийн бичиг нь тэдний үндэс угсааг тодорхойлж өгсөн гэжээ. Сонирхолтой нь Шиао овогт нь 94 сая хүн амтай /Хятадад хүн амын тоогоор гуравт ордог/ Хэнань мужийн Зангму тосгоны  Zhuang, Dahong, Ohira Zhuang Shao Kong  зэрэг 30 гаруй овогт тархан амьдарч байгаа аж.

    Хэнань муж нь түүхэндээ олон дайны гол цэг болж байсан бөгөөд шар мөрний үерт ихээхэн автдаг газар байжээ. Энэ мэдээ тосгоны иргэдийн дунд гэрлийн хурдаар тарсан бөгөөд Шиао овогт иргэд их хааны удмын хүн гэдгээ сонсоод тун сэтгэл хангалуун байсан гэж likenews.us сайтад бичжээ. Нэгэн Шиао овогт “Бид өвөг дээдсийнхээ талаар ам дамжин сонссоор ирсэн. Гэхдээ яг мөн эсэхийг нь баталж чадахгүй байсан юм. Би боломж олдвол Чингис хаан онгоныг эргэж, Монголын соёлын талаар судалж, хүүхдүүддээ зааж өгөх болно” хэмээн ярьжээ.
 Харин эрдэмтэн Ренчон Юу "Эртний монголчууд хэдэн зуун хүн зургаа эсвэл долоон зуун жилийн турш Хан үндэстэнтэй хамт зэрэгцэн амьдарч байжээ. Тиймээс тэдний хэл, хувцас, шашин шүтлэг хоорондоо уусч, тийм их ялгаагүй болсон байна" гэж мэдэгдсэн байна.