"Оньсон тоглоом-Оюунлаг ирээдүй" төсөлд Улаанбаатар хотоос хамрагдаж буй 9 дүүргийн  цэцэрлэгт тоглоомын дээжийг гардуулах ажиллагаа өчигдөр нийслэлийн 135 дугаар цэцэрлэгт  боллоо.
  Уг арга хэмжээнд БШУ-ны сайд Л.Гантөмөр, ХААН банкны гүйцэтгэх захирал Норихико Като, Оюун ухааны олон улсын музейг үүсгэн байгуулагч, Монгол улсын урлагийн гавьяат зүтгэлтэн З.Түмэн-Өлзий  нар оролцон юм. БШУ-ны сайд "Төсвөөс мөнгө гаргуулахгүй, өөрсдийн хөрөнгөөр хүүхдүүдэд оюуны хөрөнгө оруулалт хийж буй ХААН банкны хамт олонд  цэцэрлэгт хүмүүжиж буй сая гаруй хүүхдүүдийнхээ өмнөөс талархаж байна. Хүмүүжилтэй хүн гэж дуулгавартай хүнийг хэлэхгүй. Харин юм боддог, сэтгэхүй нь хөгжсөн, дүгнэлт хийдэг хүнийг хэлнэ. Энэ хүмүүжлийг олж авахад Монгол оньсон тоглоом чухал үүрэгтэй. Хүүхдийг хүмүүжүүлэх, сэтгэхүйг нээсэн энэ тоглоомыг алга болгохгүй өнөөдрийг хүртэл хадгалж ирсэн З.Түмэн-Өлзий гуайд баяр хүргэе. Энэ олон нэр төрлийн сэтгэхүй хөгжүүлсэн тоглоомоор тоглоод сурчихсан хүүхэд цаашдаа сургуульд элсээд тоо бодох, шүлэг цээжлэхэд хялбар байх болно" гэлээ.
      "Оньсон тоглоом-оюунлаг ирээдүй" нэртэй уг хөтөлбөрийг ХААН банк  хоёр дахь жилдээ хэрэгжүүлж байгаа юм. Өнөө жилийн хувьд улсын хэмжээний 50 цэцэрлэгт 30 сая төгрөгийн өртөг бүхий 7800 ширхэг оньсон тоглоомыг бэлэглэж байгаа юм байна. БШУЯ-наас  "Зөв Монгол хүн" хөтөлбөрийг боловсруулж, хөтөлбөрийн хүрээнд  цэцэрлэг сургуулийн  насны хүүхдүүдийг Монгол бахархалтай, үндэсний соёл уламжлалыг дээдэлсэн иргэн  болгон хөгжүүлэх  зорилтыг тавин ажиллаж байна. Энэхүү бодлоготой нийцсэн ажлыг ХААН банкны хамт олон санаачлан зохион байгуулж байгааг БШУЯ талархан авч ийнхүү дэмжин ажиллаж байна.