УИХ-ын 2012 оны сонгуульд МАН-аас нэр дэвшигч Б.Чойжилсүрэн, Ч.Хүрэлбаатар нар Увс аймгийн сонгогчдод мөнгө тараасан гэх мэдээллийг ТЕГ-аас яллах дүгнэлт үйлдэж, Нийслэлийн прокурорын газарт шилжүүлэх гэж байгаа талаар мэдээлсэн. Учир нь Б.Чойжилсүрэн, Ч.Хүрэлбаатар нарын туслах Ш.Чинбат, Я.Баттогтох нар бусдад мөнгө тарааж, иргэдийн саналыг худалдаж авах зорилгоор мөнгө тарааснаа хүлээсэн хэмээн эх сурвалж мэдээллээ. Тиймээс Ш.Чинбат, Я.Баттогтох нарыг сонгууль будлиантуулж төрийн эрх мэдлийг хууль бусаар авах хуйвалдаан зохион байгуулсан гэх үндэслэлээр яллах дүгнэлт үйлдэж байгаа юм байна.Нэгэнт хоёр туслах нь мөнгө тарааснаа хүлээсэн учраас Б.Чойжилсүрэн, Ч.Хүрэлбаатар нарыг УИХ-ын гишүүнээс эргүүлэн татах асуудал яригдаж магадгүй болжээ. Гэхдээ прокурорын байгууллагаас мөрдөн байцаалтын ажиллагаа хэр явагдсан эсэхэд хяналт тавигдсаны дараа уг асуудлыг ярьж эхлэх юм байна.
Хэргийг сануулбал, УИХ-ын гишүүн Б.Чойжилсүрэн сурталчилгааны үеэр "21 мянган төгрөгийг үргэлжлүүлэн олгоно" хэмээн ярьж явсан гэнэ. Энэ нь мэдээж Сонгуулийн хууль зөрчиж байгаа. Мөн Өмнөговь сумын Ардын намын байранд хотоос аваачсан оюутнуудыг цуглуулж, Ч.Хүрэлбаатар, Б.Чойжилсүрэн нарын туслах нь тус бүр 150.000 төгрөг тараагаад МАН-ын төлөө ажиллахыг хүсчээ.
Мөн Улаангом сумын иргэн Б.Цэгээгийн гэрт Б.Чойжилсүрэнгийн туслах Н.Ариунтуяа орж, гэрийг чинь түрээсэлж сонгуулийн штаб байгуулъя" гэхэд айлын эзэгтэй зөвшөөрөөгүй юм байна. Гэтэл Н.Ариунтуяа "Чойжилсүрэн гишүүнийг дэмжээрэй" гэж хэлээд 100 мянган төгрөг өгөхөд нь айлын эзэгтэй цагдаа дууджээ.
Түүнчлэн Тариалан сумын Бургастай багийн Сүүжийн зост гэдэг газарт зусч байгаа нэр бүхий 12 айлын арваар нь орж гэрийг нь түрээслэх нэрээр 100 мянган төгрөг өгөхдөө Ч.Хүрэлбаатар, Б.Чойжилсүрэнгийн нэрийг дугуйлахыг давхар сануулаад явсан байна. Үүнд нь дургүйцсэн иргэд сонгуулийн хэсгийн хороонд гомдол гаргасны дагуу АН-ынхан баримтжуулж байжээ.
Б.Золбоо
.
Сэтгэгдэл (12)