Энхтайвны гүүрэн дээрх аймшигт ослын үеэр өөрийн биеийг хайрлалгүйгээр хүний алтан амь аварсан Д.Одбаярыг МАН-ын Ерөнхий нарийн бичгийн дарга Г.Занданшатар  хүлээн авч уулзлаа. Энхрий бяцхан үрээ машиндаа түгжиж орхиод, иргэний үүргээ биелүүлэхээр дүрэлзэж буй гал руу орсон түүний зориг, шударга үйлдлийг Г.Занданшатар болон МАН-ын удирдлагууд өндрөөр үнэлж, “Тусгаар тогтнолын одон”-гоор энгэрийг нь мялаасан юм. Д.Одбаяр өөрийн хийсэн эрэлхэг үйлдлээ энгийн жирийн эр хүн бүхнээс гарах зайлшгүй үйлдэл байсан хэмээн даруухан хариулаад хамтдаа хүний амь аварсан залуу Д.Баттүвшингийн оролцоо их байсныг мөн хэллээ. Д.Одбаяр нь хэрэг болох үед дөрвөн настай хүүгийнхээ хамт явж байсан бөгөөд хүүгийнхээ нүдэн дээр хүний амь аварсандаа тун чиг сэтгэл хангалуун байгаага илэрхийлэв. Тэрбээр “Хамгийн сайхан санагдсан зүйл нь миний хүү ааваараа их бахархаж байгаа. Хүний амь аварна гэдэг хэцүү юм билээ. Галд түлэгдчих гээд, дээрээс нь банктай бензин нь дэлбэрэх вий гэсэн айдас байсан. Цагдаагийн нэг ажилтан бас нэг залуугийн хамт 2 хүнийг аварч, жолоочийг харамсалтай нь гаргаж дийлээгүй” хэмээн баяр гуниг хослуулан яриж байсан юм. Харин МАН-ын Ерөнхий нарийн бичгийн дарга Г.Занданшатар “Өнөөгийн нийгэмд хамгийн их үгүйлэгдэж байгаа хүн чанараа гээлгүй, бусдын тусын тулд өөрийн амиа золин тэмцэж, хүний алтан амь аварсан чамд талархал илэрхийлье ” гээд Тусгаар тогтнолын одон медалийг энгэрт нь зүүж өгсөн юм. Дашрамд дурдахад Д.Одбаяр нь МАН-ын дэргэдэг НАМЗХ-ы бага хурлын гишүүн бөгөөд намынхаа нэрийг өндөрт өргөж яваад гүн талархал илэрхийллээ.