Өвөрхангай аймагт УИХ-ын сонгуульд МАН-аас нэр дэвшигч Н.Төмөрхүү, С.Чинзориг нарын оронд АН-ын хоёр нэр дэвшигч тангараг өргөх болсон шийдвэрийг МАН-ынхан эсэргүүцэж байгаа билээ. Өнөөдөр УИХ-ын гишүүн Г.Баярсайхан энэ талаар байр сууриа илэрхийллээ.

  Тэрбээр "Шударга ёсны төлөөх тэмцлийн нэг хэсэг бол сонгуулийн луйврыг арилгах явдал. Ард түмнийхээ саналыг худалдаж авна гэдэг бол авлгалын нэг хэлбэр гэж би ойлгодог. Монгол улсын шүүхээр архи, мөнгө төгрөг тараасан нь нотлогдсон. Би бол үүнийг шүүх засаглаа шудага ёсны тэмцлээ хийж байна гэж ойлгож байна. Бидэнд шүүх засаглалд нөлөөлөх ямар нэг боломж байхгүй. СЕХ ч хараат бус байгууллага. Энэ хараат бус байгууллага шүүхийн шийдвэрийн дагуу энэ хоёр нэр дэвшигчийг УИХ-д хуулийн дагуу өргөн барьж байгаа. 2012 оны УИХ-ын сонгуулийн үеэр олон тойрогт иргэдийн саналыг худалдаж авсан тохиолдол байгаа. Дараа дараагийн нэр дэвшигчдэд шударга ёсны том жишээ болно гэж харж байна" гэв.

   Мөн "МАН-ын гишүүдийн зүгээс  АН хэтэрхий даварч байна гэж шүүмжилж байгаа. Энэ талаар юу хэлэх вэ?" гэсэн сэтгүүлчийн асуултанд,

- Цөөнх болж байгаа гишүүдийн тэмцлийн нэг хэлбэр. АН-ын бүх шийдвэр ард түмний төлөө байна. Шударга ёсыг уландаа гишгэж байна шүү дээ. Бид малыг малчдад, хөрөнгийг иргэдэд өгч байсан. Энэ шийдвэрүүд цөөнхөд таалагдах албагүй. Маш чухал асуудлыг хэлэлцэх цаг алдаж байгаад би харамсч байна гэсэн юм.