Өнөөдөр өглөөнөөс "Автобус-1" компанийн том оврын автобуснууд үйлчилгээнд гараагүй. Нийслэлийн хэмжээнд 11 чиглэлд үйлчилгээ үзүүлдэг тус компанийн бүх автобуснууд ийнхүү зогссон нь иргэдэд хүндрэл учруулж байгаа юм.  Тус компани нь нийслэлийн өмчит бус үйлдвэрийн газар. Нийтдээ 120 автобусны багтаамжтай. Өдөр тутам 11 чиглэлд 106 автобус гаргадаг. 600 гаран ажилчинтай тус компанийн жолооч, кондукторууд өнөөдөр өглөөнөөс эхлээд ажил хаясан байна. Нийтдээ 260 орчим жолооч, 250 контуктор тус ажил хаялтад нэгджээ. Компанийн удирдлагуудын хэлж байгаагаар ажилчид нь урьдчилан мэдэгдэлгүйгээр ажил хаялт зарласан нь хүнд нөхцөл байдал үүсэхэд нөлөөллөө гэж байгаа юм.  Нийтийн тээврийн үйлчилгээний 24 аж ахуй нэгжийн 1100 автобуснаас өдөр тутмын үйлчилгээнд 890-ээд орчим нь гардаг. Үүний гол зонхилох ачааллыг “Автобус-1” компани үүрдэг байна. Тус компанийн автобус бүхэлдээ зогсчихоор үнэхээр хүнд байдалд хүрч байна гэж нийслэлийн нийтийн тээврийн газрын дарга П.Наранцэцэг ярьсан юм.

Ажилчдын хувьд дөрвөн чиглэлээр шаардлага тавьж байгаа бөгөөд энэ нь ихэвчлэн дотооддоо шийдэх асуудал байгаа аж.

Тус шаардлагад доорх дөрвөн нөхцөлийг сайжруулахыг хүсчээ.

1. Шугамын цагийн орлогын даалгавар хэт өндөр өгөгдөж байна. Бодит байдалтай нийцэхгүй байна.

2. Илүү цагаар ажилласан цагийг үндэслэлгүйгээр хасч тооцдог. Цалин нэмж өгдөггүй. 2005 оноос хойш цалинд өөрчлөлт оруулсангүй. Цалинг хамгийн багадаа 1 сая 200 мянга болгох.

3. Хариуцлага хэт өндөр. Хариуцлагаа давхар өгдөг. Янз бүрийн урамшууллаас хасдаг. Даатгалд хамрагддаг ч даатгалын үр дүн харагддаггүй.

4. Эдгээр зүйл дээр үндэслээд автобус нэг компанийн удирдлагыг солих, одоогийн удирлагууд ажлаа хийж чадахгүй байна гэж тусгажээ.

Жолооч, кондукторууд компани нь дарамт ихтэй, захиргааны ажилчид нь хүнд сурталтай. Одоо болтол бид захирлынхаа царайг харж байгаагүй. Бидэнтэй нэг ч удаа уулзаж байгаагүй гэсэн юм. Мөн хангамж муу, өвөл өмсөх дулаан хувцас өгдөггүйгээс эхлээд цалингийн цэс үзүүлдэггүй, 400 төгрөг дутаахад л цалингийн 20 хувиар шууд торгодог гэсэн юм.

 Тус компанийн жолооч нарын үндсэн цалин 370 мянга, кондуктор 293 мянган төгрөг аж. Төлөвлөгөө нормтой ажилдаг учраас сард жолооч 700-800 мянга, кондуктор 450-600 мянган төгрөгийн тогтмол цалин авдаг аж. Ажилчид цалингаа 1 сая төгрөг болгохыг хүсч байгаа юм.  Мөн өглөө 5 цаг 40 минутад ажилчдаа цуглахад Төмөрбаатар захирал ирээд “Та бүгдийн шаардлагыг хүлээж авлаа. Та нар ингээд ажилдаа гар аа” гэсэн бол ийм асуудал үүсэхгүй байсан гэж ажилчид ярьж байлаа.  

"Автобус-1" компанийн ерөнхий инженер Б.Энхцаг: Ажилчид цалингаа 1 сая 200 мянган төгрөг болгоё гэсэн

Үүсэд байгаа нөхцөл байдлын талаар ярихгүй юу?

Жолооч, кондукторын цаг орлогын нарийн зүйлийг ярьж байна. Одоо бид бүгд хуралдаад бүх асуудлыг шийдвэрийн түвшинд ярьж байна.

Ажилчдын зүгээс хэзээ шаардлагаа тавьсан бэ?

Өнөө өглөө шаардлага нь тавигдсан. Одоо бол бүх зүйл бүрхэг байна. Хамгийн түрүүнд бид хөдөлмөрчиддөө үйлчлэх хэрэгтэй байна. Ажилчид цалингаа 1 сая 200 мянган төгрөг болгоё гэсэн.

Хуралдаж байгаа хүмүүсийн дотор ямар хүмүүс байна вэ?

Нийтийн тээврийн газрын дарга П.Наранцэцэг, ЗТЯ-ын газрын тосны үйлдвэрчний холбооны тэргүүлэгч Эрдэнэбат, Манай бүх удирдлага, ерөнхий инженер, ерөнхий нягтлан бодогч, ажилчдын төлөөлөл 22 хүн байна. Одоо бид гэрээ хийх гэж байна.

Ажилчдын шаардлагыг хүлээж авч шийдвэрлэх үү?

Хуралдаж байж шийдвэр нь гарна. Бид шаардлагыг хүлээж аваад биелүүлэх боломжтой үгүйг ярилцаж байна.

“Автобус-1” компанийн кондуктор Ч.Байгаль: Би захирлынхаа царайг нэг ч удаа харж байгаагүй

Хангамж хэр байна вэ?

Цалингийн хэмжээ, хангамж муу. Бид өглөө 4.00 цаг гээд босдог. өглөө 5 цагаас ажилдаа гараад өдөр 3.00 цаг өнгөрөөгөөд шугамаас буудаг. Тэгээд орлогоо өгөх гээд  замын түгжрэлд үйлдвэр комбинат руу явсаар байтал оройн 5.00 цаг болдог. Ингээд 5.00 цаг гэхэд оочерлэж орлогоо өгнө. Орлогоо өгчихөөд л буцаад нөгөө түгжрэлдээ явсаар 7-8 цаг болно. Гэтэл бид үр хүүхэдтэй хүмүүс шүү дээ. Цаг, орлогоор бидэнд маш их дарамт үзүүлдэг. Цаг, орлогодоо хүрэхийн тулд л жолооч нар яарч, сандарч байна. Буудал дээр жоохон зогсоод, тэр тусмаа арай олон хүн цугладаг газар хүнээ авахаар удаан зогсчихоор цагдаа нар дарамтална. Шүгэлдээд зогсоохгүй. Ийм байдлаас болж жолооч нар осол гаргаж байна шүү дээ.

Өрдийн орлогын норм яг хэдэн төгрөг байдаг юм?

Шугам шугамдаа тогтоц орлоготой. Жишээ нь манайх Шархаданд явж байна. Зуны орлого төлөвлөгөө нь 50 мянга 600 төгрөг байдаг. Нэг бүтэн эргэлтийн норм шүү дээ.  Энэ хугацаанд бид орлогоо хийж чаддаггүй.  Яагаад ч хийхгүй. Тэр бол ёстой амьдралд ойр биш.

Та яг хэдэн төгрөгний цалин авдаг вэ?

Би бохироороо 600 мянган гаргаж авдаг. Тэгээд аваанз 180, сарын сүүлээр  250  мянган төгрөг хүргэж авдаг.

Дарамталж байна гэж сонссон. Удирдлагуудын зүгээс ямар дарамт ирдэг вэ?

Манай нэг кондуктор удирдлагууддаа өөрсдийн асуудлаа ярих гэхэд “Хүний олон хүнээ иддэггүй юм олуулаа орж ирвэл орлогыг нь хасна. Зайлцгаа" гэж хэлсэн гэсэн. 

 Т.Хулан