Шинэчлэлийн Засгийн газраас МАХН гарна гэдгээ хэвлэлээр зарлаж, улс төрийн тогоонд бужигнаан үүсээд байгаа. МАХН Засгийн газраас гарвал "Шударга ёс" эвсэл задарна, Шинэчлэлийн Засгийн газар бие даагч гишүүд, МҮАН-ынхантай хамтарна эс бөгөөс Засгийн газрыг шинээр байгуулна гэх янз бүрийн таамгууд яригдаж эхлээд байна. Өнөөдөр болох МАХН-ын дарга Н.Энхбаярын шүүх хурлаар эцсийн шийд гарвал энэ бүхэн шийдэгдэнэ. Харин Шинэчлэлийн Засгийн газар задарлаа ч эс задарлаа ч УИХ-д нэг "зовлон" нэмэгдэх нь. Үндсэн хуулинд тухайн нам, эвсэл УИХ-д наймаас дээш гишүүнтэй бол бүлэг байгуулах боломжтой гэж заасан байдаг. Хэрэв Н.Энхбаярын "буянаар" "Шударга ёс" эвсэл задарвал энэ эвслийн 10 гишүүн бүлэггүй болох юм. Нэгэнт МҮАН-ын гишүүд Н.Энхбаяраас болж Засгийн газраас гарах бодолгүй байгаа тул Н.Энхбаярын ялыг хэвээр үлдээвэл энэ эвслийн гишүүд МАН-ын хэдэн сар уйлан дуулж байгаа бүлэггүйн зовлонтой нэг болох нь.

   УИХ дахь нам, эвслийн бүлэг гэдэг чуулганаас завсарлага авах, байнгын хороодод орохоос эхлүүлээд олон давуу талтай байдаг. Тиймээс энэ эрхийг эдэлж чадахгүй, ард түмнийг төлөөлж чадахгүй байна гэж МАН-ын гишүүдийн амьсгаа бачуу байгаа юм.

   Одоо УИХ-д МАН-ын 25 гишүүн, бие даагч гурав гээд бүлэггүй гишүүдийн тоо 28 байна. Дээр нь "Шударга ёс" эвслийн 10, удахгүй тангараг өргөх Д.Арвин, МАХН-ын нэг шинэ гишүүн /Ц.Оюунбаатар, Э.Батшугар?/ нар ч бүлэггүй этгээдүүдийн тоонд орно. Ингээд З.Энхболдын энэ парламент нийтдээ 40 орчим бүлэггүй гишүүнтэй болно гэсэн үг юм. Өөрөөр хэлбэл 2012 оны парламентад ганцхан Ардчилсан намын гэх бүлэг үлдэж шинэ рекорд тогтоож магадгүй байна. Засгийн газар хагарлаа нөхлөө ч, шинээр байгуулагдлаа ч бүлэг гэдэг асуудал УИХ-ын гишүүдийн шүдний өвчин болж магадгүй юм. Ийнхүү Ерөнхийлөгч асан Н.Энхбаярын гавъяагаар АН-ын засгийн үед бүлэггүй гишүүд УИХ-ын олонхийг бүрдүүлэх болох нь.