Нөгөөдөр наадам эхэлнэ. 365 хоног хүсэн хүлээсэн баяр наадмынхаа бөхийн барилдааны түрүүг аль нутгийн зүг чиглэх бол гэсэн асуулт эдгээр өдрүүдэд ид хөвөрч байна. Энэ жил зургаагаас доошгүй аварга цолтон зодоглох магадлалтай ч арай бага цолтон түрүүлнэ гэх таамаг зонхилж байна.

Ардын хувьсгалын 103 жилийн хугацаанд могой жилийн наадам найман удаа тохиосон ба 2025 оны наадам ес дэх нь юм.

Анхдугаар могой жилийн наадам 1929 онд тохиоход Архангай аймгийн Өлзийт сумын харьяа, улсын арслан Б.Банзар (31 настай) түрүүлж, 1941 оны могой жилийн наадамд 25 настайдаа дархан аварга Б.Түвдэндорж (тухайн үед улсын арслан) түрүүлж, 1953 онд 37 настайдаа дархан аварга Б.Түвдэндорж зургаа дахиа түрүүгээ хүртэж, 1965 онд 24 настайдаа дархан аварга Ж.Мөнхбат (тухайн үед улсын арслан) түрүүлж, 1977 онд 33 настайдаа дархан аварга Х.Баянмөнх түрүүлж, 1989 онд 25 настайдаа дархан аварга Б.Бат-Эрдэнэ (тухайн үед улсын арслан) хоёр дахь түрүүгээ хүртэж, 2001 онд 30 настайдаа дархан аварга А.Сүхбат (тухайн үед улсын арслан), 2013 онд 35 настайдаа улсын аварга Г.Эрхэмбаяр (тухайн үед улсын арслан) түрүүлж, аварга цолтой болж байв.

Могой жилд улсын аварга цол хүртсэн тохиолдол олон байна. Б.Түвдэндорж, Ж.Мөнхбат, Б.Бат-Эрдэнэ, А.Сүхбат, Г.Эрхэмбаяр нар улсын арслан цолноос түрүүлж аварга болж байсан бол Архангай, Булган, Увс, Төв, Хэнтий, Сэлэнгэ аймгийн бөхчүүд чухамдаа могой жилийн Улсын баяр наадмын түрүүг булаажээ.

Улсын заан цолтон нэг түрүүлсэн тохиолдлыг эс тооцвол улсын арслан, аварга цолтон түрүүлсэн жишиг олон байна. Нэг ёсондоо өндөр цолтонд ээлтэй жил аж. Могой жилийн отгон түрүүг Г.Эрхэмбаяр аварга (35 настайдаа) хүртсэн бөгөөд түүний нутгийн дүү арслан Б.Орхонбаяр түрүүлэх аваас түүх давтагдах юм.

А.Сүх