Өнгөрсөн баасан гаригт Хэнтий аймгийн Баянхутаг сумын уугуул Улсын начин Б.Одхүү МУ-ын хөдөлмөрийн баатар, олимпийн аварга Н.Түвшинбаяр, ШШГЕГ-ын “Сүлд” спорт хорооны дарга, Улсын заан Ц.Баярсайхан нарыг зодсон талаар манай сайт мэдээлсэн. Тэд Хан-Уул дүүргийн 17 дугаар хорооны нутаг дэвсгэр Япон хороололд байрлах “Garden” ресторанд архи ууж байгаад хоорондоо маргалдсаны улмаас ийнхүү зодолдсон хэмээн эх сурвалж мэдээлсэн юм. Хэргийг харьяа дүүргийн цагдаагийн хэлтэст шалгаж эхлээд байсан бол Б.Одхүү начинд Эрүүгийн хуулийн тусгай ангийн 181-т зааснаар олон нийтийн газарт танхайрч, бусдын биед халдсан гэх зүйл ангиар эрүүгийн хэрэг үүсгэн шалгаж эхэлжээ. Мөн хэрэг гарсны маргааш нь түүнд таслан сэргийлэх арга хэмжээ авсан хэмээн албаны эх сурвалж мэдээлэв.
Хэдийгээр олимпийн аварга Н.Түвшинбаярын зодуулсан нь тодорхой болсон ч тэрээр цагдаагийн байгууллагад гомдолгүй хэмээн мэдүүлээд хэрэг гарсны маргааш БНСУ руу явжээ. Харин Ц.Баярсайхан заан цагдаагийн байгууллагад гомдол гаргасан учир ийнхүү шалгаж эхэлжээ.
Хэрэг үүдсэн шалтгаан нь Б.Одхүү начинаас болсон байна. Тодруулбал, тэрээр ОО орох гэж яваад өмнө нь муудалцаж байсан хоёр залуутай таарч, тэдэн рүү дайрах гэтэл Ц.Баярсайхан заан өмөөрчээ. Гэтэл Ц.Баярсайхан зааныг ОО-д оруулж байгаад зодож, тэднийг залгах гэсэн Н.Түвшинбаяр аваргыг ч мөн зодож танхайрсан байна.
Б.Одхүү начин нь гадаадын иргэдийг бааранд зодсон, дээрэмдсэн хэрэгтээ таван жилийн ял авсан байдаг. 2.2 жилийг биечлэн эдлээд уучлалаар Багануурын хорих ангиас суллагдсан аж. Мөн өнгөрсөн наймдугаар сарын 13-нд “River Sounds” клубт Сөүлийн олимпод оролцсон боксын олон улсын хэмжээний мастер Ээнээ буюу Эрдэнэбатыг зодож хүнд гэмтэл учруулсан. Мөн өнгөрсөн дөрөвдүгээр сард УИХ-ын гишүүн Д.Ганхуягийг зодсон гэх мэдээлэл ч хэвлэлээр гарч байсан. Харин үүнийг Б.Одхүү начин, УИХ-ын гишүүн Д.Ганхуяг нар хоёулаа үгүйсгэсэн байдаг.
Юутай ч энэ удаад тэрээр олимпийн аваргад гар хүрлээ. Хэдийгээр аварга өөрөө гомдолгүй хэмээн мэдүүлээд байгаа ч олон нийтийн газар гарсан хэргийг цагдаагийн байгууллага заавал шалгадаг. Мөн Ц.Баярсайхан заан гомдол гаргасан.
Тиймээс түүний хэргийг Хан-Уул дүүргийн цагдаагийн хэлтэст шалгаж эхлээд байна. Түүнд үүсгээд буюу Эрүүгийн хуулийн 181-т бусдыг илтэд үл хүндэтгэн хүч хэрэглэх буюу хүч хэрэглэхээр заналхийлж, нийгмийн хэв журмыг ноцтой зөрчсөн бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ хэмээн заасан байдаг.
Харин Б.Одхүү начин өмнө нь ял шийтгэлтэй байсан учраас түүнд Эрүүгийн хуулийн 181.2.3 гэсэн зүйл анги нэмэгдэнэ хэмээн эх сурвалж мэдээллээ.
Б.Чимэг
Сэтгэгдэл (46)