Шударга өрсөлдөөн хэрэглэгчийн төлөө газраас өчигдөр "Жем интернэшнл" ХХК-ыг  Үйлдвэр, Хөдөө аж ахуйн сайдад хандан "Тусгай зөвшөөрөл түтгэлзүүлэх тухай" дүгнэлт гарган хүргүүлсэн тухайгаа  мэдэгджээ.  Тэгвэл "Жем интернэшнл" ХХК энэхүү дүгнэлтийг няцааж өнөөдөр хэвлэлийн бага хурал хийлээ. Энэ талаар тус компаний гүйцэтгэх захирал Б.Ойгонгэрэлээс тодруулсан юм.

-Шударга өрсөлдөөн,  хэрэглэгчийн төлөө газраас ирсэн дүгнэлт дээр яг юу гэж заасан байсан бэ?
-  Бүрэн эхээр нь танилцуулъя. "2013 оны 1 дүгээр сарын 1-ний өдөр "ТВ7" телевизээр гарсан "Үлгэрийн хайр" нэртэй уран сайхны киноны дундуур "Алтан буудай", "Тэргүүн", "Gold chinggis". "Platinum chingiss" архины сурталчилгааг түгээж Монгол Улсын хууль тогтоомжийг зөрчлөө. Иймд өрсөлдөөнд харшилсан удаа дараагийн хууль бус үйлдэлд нь "Архидан согтуурахтай тэмцэх тухай" хуулийн 16.1.2, "Зар сурталчилгааны тухай" хуулийн 24.3.4 дэх заалтыг баримтлан согтууруулах ундаа үйлдвэрлэх тусгай зөвшөөрлийг 2 сар түтгэлзүүлэх саналтай гэсэн дүгнэлт гаргав." гэжээ.

-Тэгвэл энэхүү дүгнэлтийг танай компани ямар учраас няцааж байгаа юм . Хуулийнхаа дагуу юм биш үү?
- Манай компани 2010 онд "Үлгэрийн хайр" киног бүтээгчийн хүсэлтээр  ивээн тэтгэсэн. Тухай үедээ энэ үйлдлээрээ хуульд заасны дагуу торгуулийн арга хэмжээ авахуулж байсан. Тэр үеэс хойш уг киноны дундуур байрласан зар сурталчилгааг дарж, цаашид уг киног нийтэд цацах тохиолдолд сурталчилгааг гаргахгүй байх талаар киног бүтээгчидтэй харилцан тохиролцож асуудлыг шийдвэрлэж байсан. Гэтэл энэ оны 1 дүгээр сарын 1-нд "ТВ7" телевиз "Үлгэрийн хайр" киног гаргахдаа уг сурталчилгааг гаргасан нь тухайн телевизийн хариуцлагагүй үйлдэл гэж бидний зүгээс үзэж байгаа юм. Энэ бүхнийг Шударга өрсөлдөөн, хэрэглэгчийн төлөө газрынхан нягталж үзээч ээ гэж хэлмээр байна. Гэнэт, хурцадмал байдлаар бидний үйлдлийг зогсооно гэж байгаа нь бидний хувьд гомдолтой байна.  Манай компани энэ байдлыг санаатайгаар хийгээгүй. Тухайн телевизийн хариуцлагагүй ч юм уу, санаатай ч юм уу тийм үйлдлээр тухайн киног цацсан байгаа нь туйлын харамсалтай байна.

-Тэгэхээр танай лого, бүтээгдэхүүнтэй киног санаатайгаар цацсан гэж үзэж байгаа юм уу?
-Яагаад санаатай ч байж мэднэ гэж үзэж байгаа вэ гэхээр "ТВ7" телевизтэй бид холбоо тогтоосон. Гэтэл бид нар тайлбар өгөхгүй гэж Ерөнхий менежер Отгонбилэг гэдэг эмэгтэй хэлсэн. Бид тэдэнтэй ярилцах гэсэн боловч холбоо тогтоож чадаагүй. Энэ байдлыг үндэслээд энэхүү явдлыг санаатай  үйл ажиллагаа байсан байж магадгүй гэдэг үндэслэлийг тавьж байгаа юм. Тэр киноны дундуур гарч байгаа лого, сурталчилгааг ямар нэг хяналтгүйгээр, телевизийн алдаатай үйл ажиллагаанаас болж цацсан нь тухайн телевизийн хариуцлагагүй үйлдэл. Цацагдаж байх яг тэр үед ч болов зогсоож болох байсан. Гэтэл энэ телевиз ямар нэг арга хэмжээ аваагүй.

-"ТВ7" телевизэд гомдолтой байгаагаа мэдэгдэж албан бичиг хүргүүлсэн үү?. Тэдний зүгээс ямар хариу өгч байх юм?
-"ТВ7" телевизийн удирдах албан тушаалтантай уулзах, улмаар хариуцлагагүй үйлдэл гаргасан тухай тус телевизийн зүгээс хэвлэлийн бага хурал хийх, хэрэглэгчид, төрийн эрх бүхий байгууллага болон манай компаниас уучлалт хүсүүлэхээр шаардлага гаргасан боловч тус телевизийн зүгээс захирал гадагшаа явсан, ерөнхий менежер нь амралттай байгаа гэдэг шалтгаанаар бидэнтэй уулзахгүй байна.
 Ямартай ч тус телевиз хариуцлагаа ухамсарлах байх аа гэж итгэж байна. Үйлдвэр, хөдөө аж ахуйн  байгууллага ч энэхүү нөхцөл байдлыг харгалзан үзэж шийдвэр гаргах байх.

Өмнө нь ийм асуудал гарч байсан санагдана. Тэр үед яаж шийдвэрлэж байсан бэ?
- Өмнө нь бас яг ийм асуудал гарч байсан. Энэ нь болохоор "2*2 5" гэсэн кинон дээр манай байгууллагын хоёр бүтээгдэхүүний реклам, зар сурталчилгаа байсан гэдэг үндэслэлээр Шударга өрсөлдөөн, хэрэглэгчийн төлөө газраас сануулга авсан байсан. Улмаар тухайн байгууллага нь өөрсдийнхөө хариуцлагаа ухамсарлаж, торгуулаа төлж өнгөрсөн байгаа. Бид уг нь үүнээс хойш  телевизийн программууд /хөтөлбөр/ дээр хяналт тавьж ажиллаж байсан. Тэгэхээр зарим телевизийн хөтөлбөр дээр ямар кино гарах нь тодорхой биш. Зөвхөн УСК гэсэн товчилсон нэр л явж байна.  Иймэрхүү хөтөлбөр дээр ямар ч хяналт тавих боломжгүй байдаг. Тэгэхээр хэвлэл мэдээллийн хэрэгслүүд маань цаашдаа анхааралтай хандаж Монголын кинонуудыг гаргахдаа хяналт маш сайн тавьж байх хэрэгтэй. Тэгэхгүй бол танай байгууллага шиг  ШӨХТГ-аас 10 саяг төгрөгний хохирол амсах хуулийн заалт байгаа шүү.

-Хэрэв танай компанийг хоёр сарын хугацаанд хаах шийдвэр гарвал хэр их хохирол амсах бол?
-Үндэсний хөрөнгө оруулалттай, үндэсний компани бусдын буруутай үйл ажиллагаанаас болоод 2 сараар эрхээ хасуулвал үнэхээр харамсалтай. Хэрэв манай компаний эрхийг хоёр сараар хасах юм бол энэ компанид ажилдаг 500 гаруй ажилчид цалингүй болно. Мөн татвар, нийгмийн даатгалаа төлж чадахаа болино. Борлуулалтын үйл ажиллагаанд доголдол гарахын сацуу дараагийн үр дагаврууд их гарна. Компани маань сард тэрбум орчим төгрөгний татвал төлдөг. Тэгэхээр борлуулалт зогсвол татвараа төлөх боломжгүй болно.