МАХН-ын дарга Н.Энхбаярыг суллуулахаар 100 ээж өлсгөлөн зарлахаа мэдэгдсэн. Тэд “Эхийн сүүгээрээ даллая. Энэ муухай харгислалаа зогсоо” гэсэн уриатайгаар өлсгөлөн зарлана.
    Харин үлдсэн ээжүүд нь эрүүл мэндийн үзлэгт орж, шинжилгээний хариугаа хүлээж байгаа юм байна. Тэдний шинжилгээний хариу гарсны дараа тэд ээлж дараагаараа МУ-ын Ерөнхийлөгч Ц.Элбэгдоржийн гэрийн гадна, Улсын ерөнхий прокурор Д.Дорлигжавын гэрийн гадна, Нийслэлийн прокурорын газрын Ял эдлүүлэх ажиллагаанд хяналт тавих хэлтсийн дарга Ц.Мөнхбатын гэрийн гадна, Төрийн ордны гадна, Улсын болон Нийслэлийн прокурорын гадна, Хэлмэгдэгсдийн хөшөө, ШШГЕГ-ын гадна, Зайсангийн дамжин өнгөрүүлэх хорих 401 дүгээр ангийн гадна хуваагдан, гэр барин өлсгөлөнгөө үргэлжлүүлнэ гэлээ.

    Өлсгөлөн зарлаж буй ээжүүд “Бид төрөхдөө үхлээс айгаагүй. Тиймээс одоо өлсгөлөнгөөс айна гэж байхгүй. 100 ээжийн зовлон, нулимс нийлэн энэ хүнийг аварч чадах юм бол бид чадах бүхнээ хийнэ. Юутай ч энэ хүнийг хурдан эмнэлэгт шилжүүлж, эмчилгээ сувилгааг нь хийлгэмээр байна” гэв.

    МАХН-ын дарга өдгөө Зайсан дахь дамжин өнгөрүүлэх хорих 401 дүгээр ангийн нэгдсэн эмнэлэгт хэвтэн эмчлүүлж байгаа. ЭМЯ-наас томилогдсон эмч нарын бүрэлдэхүүн МАХН-ын дарга Н.Энхбаярт үзлэг шинжилгээ хийн, түүнийг яаралтай Клиникийн хоёрдугаар эмнэлэгт шилжүүлэх шаардлагатай гэсэн дүгнэлт гаргасан ч Нийслэлийн прокурорын газраас 2002 онд батлагдсан Хууль зүй дотоод хэргийн сайд, Эрүүл мэндийн сайдын 313/316 тушаалаар баталсан журмын дагуу шилжүүлэх боломжгүй хэмээн мэдэгдсэн билээ. Уг журамд “Хүнд гэмт хэрэгт шийтгүүлсэн ялтныг клиникийн эмнэлэг төрөлжсөн үйлчилгээний төв, орон нутгийн нэгдсэн эмнэлэгт шилжүүлж эмчлүүлэхийг хориглоно” хэмээн заажээ.

    Н.Энхбаяр нь өлсгөлөнгийн дараах үеийн эрхтэн системийн тогтолцооны өөрчлөлттэй, хордлого хүнд хэлбэртэй, стрессийн улмаас биеийн байдалд өөрчлөлт орсон гэсэн оноштой эмчлүүлж байгаа билээ.