Улсын Их Хурал өчигдрийн чуулганаараа Ерөнхий сайд Л.Оюун-Эрдэнэд итгэл үзүүлэхгүй гэж шийдвэрлэснээр Засгийн газар бүрэн бүрэлдэхүүнээрээ огцорсон.

Дараагийн Засгийн газар байгуулахдаа МАН хоёр удаа улиран сайд хийсэн хүмүүсээ шинэ танхимд оруулахгүй гэсэн зарчмын байр суурьтай байгаа бөгөөд үүний нэг нь Л.Оюун-Эрдэнэ сайдын хоёр удаагийн Засгийн газарт улиран сайд хийж байгаа Соёл, спорт, аялал жуулчлал, залуучуудын сайд Ч.Номин юм.

Нэгэнт нам нь энэ зарчмаар дараагийн томилгоогоо хийх нь тодорхой учир “улирсан” сайд Ч.Номин их л сандралтайгаар албан тушаалын холио солиог салбар дундаа хийж эхэлжээ. Ч.Номин сайдын хувьд 5 жил сайд хийхдээ өөрийн яамны харьяа байгууллагуудад төсвөө шилжүүлэх замаар татвар төлөгчдийн мөнгийг эргэлдүүлдэг схем бий болгосон гэх хардлага байдаг.

Төсвийн схемийг гардан гүйцэтгэсэн хамсаатнуудаа Засгийн газар огцрохтой зэрэгцэн энэ өдрүүдэд яаран албан тушаал ахиулан томилж байгаа мэдээлэл байна. Тухайлбал, Соёл, урлагийн газрын даргаар 4 жил ажиллаж гол төсвүүдийг нь гардан зарцуулсан Н.Мөнхзулыг яамныхаа стратеги бодлогын газрын даргаар саяхан томилсон байна.

Түүний оронд мөн л схемийнх нь хамтрагч, нийслэлийн агентлагийн нэгэн даргыг томилуулах саналыг Засгийн газрын хуралдаанд хэлэлцүүлэхээр Засгийн газрын Хэрэг эрхлэх газар хавиар лоббидож яваа сурагтай. Нийслэлийн агентлагийн энэ дарга нь Соёлын сайдын зөвлөх С.Оюунбилэгийг санхүүжүүлдэг гол хүмүүсийнх нь нэг болсон гэж яамныхан нь ам нэгтэй ярих болсон.

Төрийн албаны туршлагагүй ч 5 жил салбарын сайд хийсэн Ч.Номин нь өнгөрсөн жил Сонгинохайрхан дүүргийн иргэдийн итгэлийг хүлээж УИХ гишүүнээр сонгогдсон хэдий ч нэг ч удаа тойрогтоо эргэж очилгүй сонгогчдоо бүрэн мартжээ. Төрийн ажлыг лоббины ажил гэж ойлгосон тэрээр бүх ажлыг лоббидож хийх ганц аргатай аж. Сонгуулийн дараа Засгийн газрын бүтцийг зурахад оройлон оролцож, Засгийн газрын Хэрэг эрхлэх газрын даргад өөрийгөө сойж явсан түүний хамаарал бүхий аж ахуйн нэгжүүд рүү төрийн мөнгө урссан гэдэг юм билээ. Соёлын сайдын өнгөрсөн 5 жилийн төсвийн зарцуулалтыг ухаад үзвэл Ерөнхий сайдын огцрох шалтгааны үндэс болсон “орлого нотлох”-ын үзүүр эндээс ч гарч мэднэ.

А.Сүх