Монголын Засгийн газар өнгөрсөн жилээс “Оюутолгой”-н гэрээг шинэчлэх тал дээр хатуу байр суурь баримталж байгаа билээ. Оюутолгойн 34 хувийг эзэмшиж буй төр эзэмшлээ 50 хувь хүртэл өсгөж, 2009 оны хөрөнгө оруулалтын гэрээг өөрчлөх байр суурьтай байгаа. Уул уурхайн үндсэрхэг үзэлтэн сайд Х.Ганхуяг ч мөн энэ гэрээг өөрчлөх гэж сайд болсон. Одоогийн УИХ ч өөрчлөхийн төлөө ажиллаж байна.

    Монголын Засгийн газар өнгөрсөн жилээс “Оюутолгой”-н гэрээг шинэчлэх тал дээр хатуу байр суурь баримталж байгаа билээ. Оюутолгойн 34 хувийг эзэмшиж буй төр эзэмшлээ 50 хувь хүртэл өсгөж, 2009 оны хөрөнгө оруулалтын гэрээг өөрчлөх байр суурьтай байгаа. Уул уурхайн үндсэрхэг үзэлтэн сайд Х.Ганхуяг ч мөн энэ гэрээг өөрчлөх гэж сайд болсон. Одоогийн УИХ ч өөрчлөхийн төлөө ажиллаж байна.

    Харин өчигдрөөс “Рио Тинто” Оюутолгойн алт, зэсний төслийг түр хугацаанд хойшлуулж байгаа тухай мэдээлэл олон улс төдийгүй монголд цацагдах болсон билээ.

    Олон улсын ихэнх хэвлэлүүд “Рио Тинто Оюутолгойн үйл ажиллагаагааг зогсоох гэж байгаа нь илүү хувь эзэмшихийн хүссэн Монголын Засгийн газарт хариу барьж буй хэрэг юм” хэмээн дүгнэж байна.

    Харин хэдхэн цагийн өмнөөс гадаад эх сурвалжууд “Рио Тинто” энэхүү мэдээлэлд бөөрөнхий хариу өгч эхэлсэн талаар мэдээллээ.

    Bloomberg: “Рио Тинто”-д ажилладаг нэрээ нууцлахыг хүссэн хоёр ч эх сурвалж Оюутолгой төслийн үйл ажиллагааг зогсоох гэж байгаа талаар манай сайтад мэдээлэл өгсөн билээ. Харин Австралийн Мельбурн хотод байрлах “Рио Тинто” салбарын хэвлэлийн төлөөлөгч Бриус Тобиноос энэхүү мэдээллийн талаар тодрууллаа. Тэрбээр “Бид Монголын Засгийн газрыг оролцуулаад бүх хувьцаа эзэмшигчиддээ Оюутолгой төслийн үр ашгийг хүргэхийг хичээнэ” хэмээн хэлсэн боловч үйл ажиллагааг түр зогсоох тал дээр тайлбар хийхийг хүссэнгүй.

    Reuters, Mineweb: Оюутолгой төслийн 66 хувийг эзэмшиж буй “Рио Тинто”-ийн хэвлэлийн төлөөлөгч Айлтуд Харри төслийн үйл ажиллагааг түр зогсоох тухай мэдээллийг үгүйсгэж “Бид Оюутолгой төслийг хэвийн явуулж 2013 оны эхний хагас жилд бүтээгдхүүнээ экспортолж эхэлнэ” хэмээн хэлэв.

    Лондонд төвтэй “Рио Тинто”-ийн улс улсад байрлах хэвлэлийн төлөөлөгчид нэгэн байр суурийг үзүүлэхгүй өөр өөр мэдэгдэл хийж байгаа нь асуудлыг улам ээдрээтэй болгож байна. Мөн энэхүү асуудалд толгой компаний зүгээс нэгдсэн хариу өгөхгүй, "Рио Тинто"-ийн Монгол дахь хэвлэлийн төлөөлөгч тайлбар өгөхгүй гэсэн нь Оюутолгой тэслийн үй ажиллагааг хойшлуулах вий гэсэн болгоомжлолыг төрүүлж байна.

    Хэрвээ 2013 оны эхний хагаст бүтээгдэхүүнээ экспортолж эхлэх “Оюутолгой” төслийн үйл ажиллагаа түр зогсох юм бол тоолж баршгүй олон хямрал үүснэ. Оюутолгойд хамааралтай олон байгууллага хаалгаа хааж, олон мянган хүн ажлаасаа халагдаж нэг ёсондоо Монголын эдийн засаг сүйрнэ гээд хэлчихэд илүүдэхгүй биз.  Хямрал Монголоор ч зогсохгүй дэлхийн зах зээл дэх зэсийн үнэ өснө гэдгийг ч шинжээчид онцолж буй юм.

    Энэ тухай мэдээлэл өчигдөр цацагдмагц “Оюутолгой” төслийн 66 хувийг эзэмшиж буй “Turquoise Hill Resources” компанийн хувьцаа 3.56 хувиар буурч, 7.86 долларт хүрээд байна.