Мексикийн Акапулко хотод баг өмссөн буутай этгээдүүд жуулчин эмэгтэйчүүдийг сүрдүүлэн, хүчирхийлсэн хэрэг өчигдөр гарчээ. Хэрэгтнүүд испани гаралтай 20-34 насны зургаан эмэгтэйг буугаар сүрдүүлэн кабелийн утсаар хүлсэн байна. Акапулко хотын дарга Луис Валтон хэвлэлийнхэнд мэдэгдэхдээ "Бид энэ хэргийг үйлдсэн хэрэгтнүүдийг олж, зохих шийтгэлийг нь онооно. Энэ явдал манай хотын нэр хүндэд маш муугаар нөлөөллөө" гэжээ. Харин тэрбээр үүнийхээ дараа "Болсон хэрэгт гүн харамсаж байна. Гэхдээ ийм хэрэг дэлхийд хаа сайгүй болж л байдаг" гэж хэлсэн нь олон хүний дургүйцлийг хүргэсэн аж. Тиймээс Луис Валтон дахин уучлалт гуйжээ.

    Хохирогчид одоо Мексикийн цагдаагийн хамгаалалтанд байгаа бөгөөд хэргийг шалгаж эхэлжээ. Акапулко нь Мексикийн аялал жуулчлалаараа алдартай хот. АНУ-ын ерөнхийлөгч Ж.Кеннеди энд бал сараа өнгөрүүлж байсан аж. Мексикийн бусад хотуудтай харьцуулвал хар тамхи, хүний наймаа бага гардаг ч дээрмийн хэрэг тасардаггүй байна.