УИХ-ын чуулганаар “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол”-ыг батлах тухай УИХ-ын тогтоолын төслийн анхны хэлэлцүүлгийг хийж байна.  Энэ төлөвлөгөөг 3 жил боловсруулж, 25 удаа хэлэлцүүлэг хийж, 10 мянган гаруй хүнээс санал авчээ.  Одоо орон зайн бүсний ерөнхий төлөвлөгөөг гаргасан бөгөөд үүний дагуу нарийн төлөвлөгөөнүүд хийгдэх аж.

УИХ-ын гишүүн Ц.Цолмон: "Хүн амын механик өсөлтийг хязгаарлаж,  2030 он хүртэл нэг сая хүнтэй байхаар төлөвлөөд бусад хотуудыг хөгжүүлэх хэрэгтэй гэдгийг өмнө нь ярьж байсан. Дархан гэхэд 500 мянган хүнтэй байж болохоор байршилтай газар. Баруун, зүүн талын хоёр хотыг нэлээн өргөтгөж Өлгий, Чойбалсан хотыг 100 мянган хүнтэй хот болгох боломжтой гэх зэргээр орлуулах бодлогоо гаргаж тавих ёстой" гэв.
    Үүнд тогтоолын төслийн ажлын хэсэг хариулахдаа "Улаанбаатар хотод хүн амын энгийн өсөлтөөр тооцвол 2020 он гэхэд 1,4 сая болох тооцоо гарчээ. Хэрэв хязгаарлах арга хэмжээ авахгүй бол 2 сая гараад явах бололтой байгаа аж. Хэрэв нийт хүн амын 6 хувь нь амьдарч байгаа дагуул хотуудыг бодлоготойгоор хөгжүүлж, хүн амын 20 хувь амьдардаг болгохоор тусгасан. УИХ-аар батлагдсан Шинэ бүтээн байгуулалт төслийн хүрээнд бүс нутгийн хөгжлийн асуудал багтаж байгаа " гэлээ.  

   Мөн энэ тогтоолд 2020 он хүртэлх төлөвлөгөөг хэрэгжүүлсний дараа 2030 он хүртэл Улаанбаатар хотыг хөгжлийн чиг хандлагыг тодорхойлохоор оруулсан байна. 2030 он гэхэд хотын иргэдийн 80 хувь нь инженерийн холбоотой орон сууцанд орсон байх аж. Энэ бүтээн байгуулалтанд 2020 он 30 гаруй их наяд төгрөг хэрэгтэй болох бол үүний дараа 2030 он хүртэл 42 их наяд төгрөг шаардлагатай гэсэн тооцоо гаргажээ.